Өнгөрсөн онд Цагаан сарын баяр хоёрдугаар сарын эхээр болсон бол ирэх онд сүүлээр тохиож байна. Тодруулбал хоёрдугаар сарын 23 (ням гараг) битүүний өдөр бол 24-нд (даваа гараг) шинийн нэгэн тохиож байна.  

XVII жарны “Хотол төгс” хэмээгч төмөр хулгана жил хаврын тэргүүн шар барс сар

Аргын тооллын 2 сарын 24, Сумьяа гараг. Билгийн тооллын 1, Шувуун хушуут одтой, улаагчин тахиа өдөр. Өдрийн наран 7 цаг 44 минутад мандан, 18 цаг 27 минутад жаргана. Тухайн өдөр үхэр, могой жилтнээ аливаа үйлийг хийхэд эерэг сайн. Эл өдөр элдэв үйлд хянуур хандах хэрэгтэй ба ан, гөрөө хийх, мал, адгуус муулах, лусыг тахих, хагалгаа хийлгэх, буг дарах, газрын ам бооход сайн. Мод суулгах, нарийн зөвлөгөөн хийх, сэтгэлд сэвтэй газар очих, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа  болой. Хол газар яваар одогсод баруун зүгт мөрөө гаргавал зохистой. Үс шинээр үргээлгэх буюу засуулахад тохиромжгүй.