Нийслэлийн хэмжээнд томуу, томуу төст өвчний үеийн хэвтүүлэн эмчлэх орны ачаалал нэмэгдэж буйтай холбоотойгоор Эрүүл мэндийн сайд С.Чинзориг тушаал гаргаж ирэх гуравдугаар сарын 01-нийг хүртэл зарим дүүргийн эмнэлгийн насанд хүрэгчдийн хэвтүүлэн эмчлэх тусламж үйлчилгээг түр шилжүүлэх зохицуулалтыг хийх үүргийг холбогдох албаныханд өглөө.

Уг зохицуулалтаар эхний ээлжинд Сүхбаатар дүүргийн 18-20 дугаар хорооны насанд хүрэгчдийн дотрын эмгэгийн хэвтүүлэн эмчлэх тусламж үйлчилгээг Улсын нэгдүгээр төв эмнэлэг, Баянзүрх дүүргийн 1-3, 25, 26 хороо, Сүхбаатар дүүргийн 16, 17 дугаар хорооны насанд хүрэгчдийн дотрын эмгэгийн хэвтүүлэн эмчлэх тусламж үйлчилгээг Улсын хоёрдугаар төв эмнэлэгт, Чингэлтэй дүүргийн 8, 13, 14, 16, 19 дүгээр хорооны насанд хүрэгчдийн дотрын эмгэгийн хэвтүүлэн эмчлэх тусламж, үйлчилгээг Улсын гуравдугаар төв эмнэлэгт түр шилжүүлэх бөгөөд Эх, нярай эмэгтэйчүүдийн үндэсний төв-II, Эх хүүхдийн эрүүл мэндийн үндэсний төв, “Амгалан”, “Өргөө” амаржих төрөлжсөн мэргэшлийн эмнэлгүүд харьяаллын дагуу жирэмсэн эхчүүдийн амьсгалын замын өвчлөл, дотрын тусламж үйлчилгээг хариуцах юм.

Халдварт өвчин судлалын үндэсний төвийн жилийн эцсийн буюу 52 дугаар долоо хоногийн томуу томуу төст өвчний мэдээгээр аймаг, дүүргийн хэмжээнд хүүхдийн тасагт хэвтэн эмчлүүлж буй хүүхдийн 80.9 амьсгалын замын цочмог хүнд халдвартай ба өмнөх долоо хоногтой харьцуулахад 7.2 хувиар нэмэгдсэн. Энэ нь улсын хэмжээнд томуу, томуу төст өвчний тархалтын түвшин улирлын томуу, томуугийн цар тахлын хүндрэлийн үнэлгээгээр нийтийг хамраагүй буюу алаг цоог тархалтын түвшинд байгаа аж.

Мөн 2023 оны нэгдүгээр сарын 09-ний байдлаар нийслэлийн хэмжээнд хүүхдийн эмнэлгүүдийн 2088 орон дээр 1979 хүүхэд хэвтэн эмчлүүлж байгаа нь нийт орны ачаалал 90.7 хувьтай байгаа бөгөөд эмнэлгийн коридор, зориулалтын бус өрөөнд хэвтсэн хүүхэд байхгүй байгаа юм.

Хүүхдийн яаралтай түргэн тусламжийн төвөөр 1387 хүүхэд үзүүлснээс 844 нь орой 18 цагаас шөнө 00 цагийн хооронд эмнэлэгт хандсан байна. Эдгээрээс зөвлөгөө авч буцсан хүүхэд 1128, эмчилгээ хийлгэсэн хүүхдийн тоо 411 буюу 26.9 хувь нь байна. Коридор болон зориулалтын бус өрөөнд хэвтсэн хүүхэд байхгүй.

Нийслэлийн хэмжээнд томуу, томуу төст өвчний дэгдэлтийн үед томуугийн шинж байдал, босго үзүүлэлтийг үндэслэн авах арга хэмжээний төлөвлөгөөг боловсруулж, өвчлөл дэгдэлтийн нөхцөл байдалд нийцүүлэн эмнэлгийн тасаг, нэгжийн үйл ажиллагааг өөрчлөн зохион байгуулах, хүний нөөцийг нэмэлтээр ажиллуулан зохицуулалт хийж байгаа юм.

Хүүхдүүдийг коридорт эмчлүүлэхгүйн тулд насанд хүрэгчдийн зарим эмчилгээний хэсгийг шилжүүлж, ор нэмж дэлгэх зохицуулалтыг хийж байна

Мөн Эмнэлгийн тусламжийн газрын Анхан болон лавлагаа шатлалын тусламжийн хэлтсийн дарга Г.Навчаа томуугийн нөхцөл байдлын талаар мэдээлэхдээ,

"Энэ жилийн хувьд бага насны хүүхдүүд ханиад томуугаар өвчилсөн тохиолдолд хатгаа болж хүндрэх эрсдэл өндөр байна. Тиймээс хэвтэлтийн тоо их байна. Мөн хүүхдүүдийн эмчлэгдэх хугацаа 5-6 хоног байдаг байсан бол энэ жил 6-10 хоног болж уртассан. Үүнтэй холбоотойгоор орны эргэлт удааширч, орны эрэлт нэмэгдэж байна.

Тиймээс бид насанд хүрэгчдийн дотор, мэдрэлийн эмчилгээний хэсгүүдийг харъяаллын дагуу шилжүүлж, хүүхдүүдээ коридорт хэвтүүлэхгүй, ор нэмж дэлгэх зохицуулалтыг хийж байна. Мөн өрхийн эмнэлгүүдийг уртасгасан цагаар ажиллуулж байна.

Мөн 18-25 насны залуучуудад анхаарах шаардлагатай байна. Учир нь эдгээр насныхан ханиад хүрээд шинж тэмдгээ тодорхой хэлдэггүй, эмчийн бичиж өгсөн эмийг уухгүй байх гэх мэт үйлдэл гаргаж байгаа тул хүндрэх хандлага ажиглагдаж байна. Тиймээс эцэг эхчүүд өсвөр насны хүүхдүүддээ мөн анхаарахыг зөвлөж байна" гэлээ.