Нийслэлийн Баянзүрх дүүргийн 1 дүгээр хорооны нутаг дэвсгэр, РЦНК-ийн урд талбайд ногоон байгууламж сүйтгэж буй асуудлаар оршин суугчид өнөөдөр /2022.09.14/ мэдээлэл хийлээ.
Энэ талаар оршин суугчдын төлөөлөл иргэн Ж.Энхбат “Өнгөрсөн сарын 10-наас хойш БЗД-ийн нэгдүгээр хорооны нутаг дэвсгэрт орших 2.7 га орчим талбай бүхий энэ газарт иргэдийн амьдрах орчин, мод бутыг сүйтгэсэн үйлдэл шөнийн цагаар явагдлаа. Бид энэ тухай 102 дугаар болон Экологийн цагдаагийн албанд өдөр, шөнөгүй дуудлага өгдөг ч ямар ч арга хэмжээ авдаггүй, баримтжуул л гэдэг. Сүүлийн долоо хоног оршин суугчид ногоон байгууламжаа аварч үлдэхийн тулд шөнө бүр жижүүрлэн хонож байгаа. 17 байрны оршин суугчдаас 275 хүн төлөөлөн өчигдөр төрийн захиргааны албан тушаалтнууд, Ерөнхийлөгчөөс эхлээд төрийн өндөрлөгүүдэд гомдол гаргасан. Тэрбум модыг тарих биш устгах ажиллагааг хотод газрын наймаачид хийж байна" гэсэн юм.
