УИХ дахь АН-ын бүлэг өнөөдөр хуралдаж, бүлгийн хурлаас гарсан шийдвэрийн талаар АН-ын бүлгээс мэдээлэл хийлээ. Бүлгийн дарга Д.Ганбат "Өнөөдрийн хуралдаанаар хоёр асуудал хэлэлцлээ. Нэгдүгээрт, Монгол Улсын 2022 оны төсвийн Үндэсний аудитын дүгнэлтийг, мөн Засгийн газраас өргөн мэдүүлсэн 2022 оны төсвийн төсөлд өгсөн санал дүгнэлтийг сонссон. АН-ын бүлэг удахгүй санал дүгнэлтээ өгөх болно" гэв.

Ингээд сэтгүүлчдийн сонирхсон асуултад хариуллаа.

-АН-ын бүлэг дотоод зөрчлийн асуудлаа хэлэлцсэн үү. Бүлгийн албан ёсны дарга нь хэн бэ?

-Би албан ёсны дарга нь. Ажлаа хэвийн хийж байна.

-Улсын төсвийг өргөн бариад зөндөө хугацаа өнгөрлөө. Гэтэл цөөнхийн бүлэг санал дүгнэлтээ одоо болтол өгөөгүй нь ямар учир шалтгаантай вэ?

-Хуулийнхаа дагуу явж байна. Хоёрдугаар хэлэлцүүлэгт АН-ын бүлэг дүгнэлтээ гаргаж өгөх ёстой байдаг. 2022 оны төсөв 18 их наядын зарлагатай, 15 их наядын орлоготой төсөл байна лээ. Мөн 440 гаруй арга хэмжээг санхүүжүүлсэн төсөл байна. Үүний 62 нь тодорхой биш байна лээ. Үүнд санал дүгнэлтээ гаргаж өгнө.

-Таныг Засгийн газраас сайдын гурван суудал нэхсэн гээд байгаа. Энэ асуудал юу болсон бэ?

-Засгийн газраас ямар нэг зүйл горьдсон юм байхгүй. Хуулийн дагуу ч боломжгүй. Гэхдээ Монгол Улсын төлөө тодорхой хэмжээнд хамтарч ажиллах ёстой.

-Ирэх жилийн төсөвт гишүүд тойрогтоо бүтээн байгуулалтын ажил босгоход 4 тэрбум төгрөг төсөвлөсөн гээд байгаа. Үүнийг хэрхэн харж байгаа вэ?

-Улс орны нөхцөл байдал хүнд байхад гишүүд тойрогтоо их хэмжээний мөнгө төсөвлөх нь нийцтэй биш байх. Тиймээс татгалзах ёстой гэдэг саналыг ганц нэг гишүүн гаргасан. Үүнтэй санал нэг байна. Үндэсний аудитын газраас тодруулахад "Бүх юм хуулийн дагуу" гэж байна лээ.