Хаврын чуулган эхлэв үү үгүй юу АН-ынхан Н.Учралыг УИХ-ын даргын үүрэгт ажлаа өгөх шахалтыг үзүүлж эхэллээ. Тодруулбал, өнөөдөр УИХ дахь АН-ын бүлэг хуралдаж, УИХ-ын дарга аль нэг намын дарга байж болохгүй тул МАН-ын дарга Н.Учралыг УИХ-ын даргын ажлаа өгтөл чуулганы нэгдсэн хуралдаанд оролцохгүй гэх улс төрийн мэдэгдлийг хийгээд амжлаа. Гэхдээ АН-ын бүлгийн эл шийдвэр өнөөдөр л гэнэтхэн гарч буй шийдвэр биш юм. Өнгөрөгч амралтын өдрөөс л эхлэн ЗГ дахь дэд сайд нарыг цөөлөх асуудал хөндөгдөж, улмаар АН-ынхан чуулганы хуралдаанд оролцохгүй байх тодорхой шийдэлдээ хүрцгээсэн байв. Энэ үйл явцыг ч батлах мэт өнөөдөр өглөө Засгийн газар ээлжит бусаар хуралдах байсан боловч цуцлагдсан. Өөрөөр хэлбэл, АН-ынхан хоёр, гуравхан дэд сайдыг чөлөөлснөөр энэ асуудал шийдэгдэхгүй гэж харсан тул цаашдын улс төрөө бодсон хэрэг. Тиймээс ч хаврын чуулганы эхэнд МАН-ынханд намын дарга Н.Учралаа Ерөнхий сайд болго гэдэг шахалтыг алсуураа үзүүлж эхэллээ. Энэ шахалт сөрөг хүчний өнөөдрийн улс төр болоод ирэх сонгуулиудад ч ач холбогдолтой юм.

Нэгдүгээрт, гүйцэтгэх засаглалын тэргүүн гэдэг бол "спикер"-тэй харьцуулахад хамаагүй эрсдэлтэй суудал гэж хэлж болно. Энэ утгаараа Н.Учралыг Ерөнхий сайд болгож гүйцэтгэх засаглалын тэргүүнээр авч ирснээр тэрбээр улс төр дэх нэр, нөлөөгөө илүү хурдтайгаар алдаж, асуудалд ч орж эхэлнэ.

Хоёрдугаарт, дахиад л нэг Засгийн газар. МАН-ын Засгийн газар ийм тогтворгүй болох нь ирэх 2027, 2028 оны сонгуулиудад АН-д хэрэг болно. Энэ нөхцөлд иргэд ч засаг тогтворгүй байна гэх үнэлэлт дүгнэлтийг өгөөд эхэлнэ. Нөгөөтээгүүр засаг дотор сайдын "суудал" гарахын хэрээр МАН доторх эрх мэдлийн төлөөх өрсөлдөөн хурцдана.

Ингээд харвал АН-ын бүлгийн энэ шийдэл өөрсдөд нь тун ашигтай байж болох хувилбар. Харин одоо энэ нөхцөл байдлыг МАН-ынхан хэрхэн манивер хийж давахыг л харах үлдлээ.