Баянгол дүүргийн 12 дугаар хороо, бичил хорооллын дулааны шугамын ажил үргэлжилж байна. Дээрх ажилтай холбогдуулан Улаанбаатар хотын Ерөнхий менежер бөгөөд Захирагчийн албаны дарга Ц.Төрхүү холбогдох албаныхантай хамт тус байршилд ажиллалаа.

Тэрбээр 2024-2025 оны өвөлжилтийн бэлтгэл ажлын хүрээнд Европын сэргээн босголт, хөгжлийн банкны санхүүжилтээр 400 мм голчтой хос хоёр шугамыг тус байршилд шинээр татаж буй. Өнгөрсөн хугацаанд 500 метрийн урт шугамын ажлыг хийж гүйцэтгэсэн бөгөөд авто замыг хөдөлгөөнийг нээхээр ажиллаж байна. Мөн тус байршилд хонгилын систем нэвтрүүлж буй. Энэ нь жил бүр газар ухаж засвар хийлгүйгээр, жижиг оврын техник ажиллах бололцоог бүрдүүлж байгаа. Шугам хоолойн шинэчлэлтийн ажлыг халаалтын улирал буюу есдүгээр сараас өмнө ашиглалтад оруулахаар 24 цагаар ажиллаж байгаа. Улаанбаатар хотын гэр хорооллыг орон сууцжуулах замаар утааг багасгахын тулд эхлээд дэд бүтцийг нь шийдэж байгаа гэдгийг тодотголоо.

Гэмтлийн эмнэлгийн уулзвараас 3,4 дүгээр хорооллын И-Март дэлгүүрийн уулзвар хүртэл 1,3 км дулааны шугамын ажил үргэлжилж байна. Тухайн шугам нь 400 мм голчтой хос шугам бөгөөд Баянгол дүүргийн бичил хорооллын айл өрхийг дулаанаар хангана.