2022 оны 3 сарын 16-ны өдөр Хан-Уул дүүргийн ЕБС-ийн төгсөх ангийн сурагчид болон ЭЕШ өгөхөөр бэлтгэж буй хүүхэд залууст зориулсан “NextGen 2022” хөтөлбөр албан ёсоор нээлтээ хийлээ. Хан-Уул дүүргийн 18 ЕБС, 4 МСҮТ-ийн төгсөх ангийн нийт 150 гаруй сурагчид оролцсон тус нээлтийн үйл ажиллагааны үеэр УИХ-ын гишүүн Г.Амартүвшин, “TomYo” аппликейшнийг үүсгэн байгуулагч В.Баярсайхан, ХААИС-ийн ЭЗБС-ийн захирал М.Эрдэнэбаяр нар мэргэжил сонголтын талаар лекц уншиж, үнэт зөвлөгөө өгч, өөрсдийн туршлагаас хуваалцсан байна.

УИХ-ын гишүүн Г.Амартүвшиний санаачилгаар “Амар Сан” ТББ-ын хэрэгжүүлж буй “NextGen 2022” хөтөлбөрийн хүрээнд сурагчдад мэргэжлээ зөв сонгох, ЭЕШ-д бэлтгэх аргачлал, шалгалтын айдсаа давах сэтгэл зүйн зөвлөмж гэх зэрэг хичээлүүд цахимаар орох бөгөөд мэргэжлийн багш нар, менторууд болон сэтгэл судлаач нартай хамтарч буй гэдгээрээ онцлогтой юм.

“NextGen 2022” хөтөлбөр нь гурван үе шаттай явагдах юм. Эхний хэсэг болох “Мэргэжил сонголт, карьер төлөвлөлт”-ийн сургалтад

• Карьер хөгжлийн төвийн захирал Ц.Булган,
• “TomYo” аппликейшнийг үүсгэн байгуулагч В.Баярсайхан,
• Сэтгэл судлалын үндэсний төвийн сэтгэл судлаач Д.Намуун,
• “Дейл Карнеги” трэйнинг Монгол дахь салбарын захирал Б. Энхболд,
• УИХ-ын гишүүн Г.Амартүвшин нар оролцож, үнэтэй зөвлөгөө өгөх төдийгүй өөрийн туршлагаас хуваалцах юм.

Харин хоёрдугаар хэсэг болох “Амжилттай ЭЕШ” сургалт хичээлийг

• МУИС-ын профессор, зөвлөх багш М.Ганбат,
• Гурван-Эрдэнэ багшийн дээд сургуулийн тэнхимийн эрхлэгч Н.Давий-Од,
• “Pixelab” боловсролын төвийн англи хэлний багш Ж.Төгөлдөр,
• Эрдэмтөгс бүрэн дунд сургуулийн нийгмийн ухааны багш Т.Одонсувд,
• Сэтгэл судлалын үндэсний төвийн сэтгэл судлаач Г.Отгонцэцэг зэрэг улсдаа нэр хүндтэй чадварлаг багш нар орох аж.

Уламжлал ёсоор хөтөлбөрийн хүрээнд сургалтад идэвхтэй оролцсон, ЭЕШ-аа амжилттай өгсөн сурагчдад тэтгэлэг олгох юм байна. Өнгөрсөн жилийн “NextGen2021” хөтөлбөрт хамрагдсан, ЭЕШ-аа өндөр оноотой давсан 10 сурагчид УИХ-ын гишүүн Г.Амартүвшин сургалтын тэтгэлэг олгож, ирээдүйд нь үнэтэй хөрөнгө оруулалт хийсэн билээ.

Тус цахим сургалт нь 6 сарын 1-ийг хүртэл үргэлжлэх бөгөөд үнэ төлбөргүй явагдана. Хэрэв та хамрагдах хүсэлтэй байгаа бол "NextGen" Хөтөлбөр Facebook группд элсэж, бүртгэлийн хуудсыг бөглөх шаардлагатай.

"NextGen" Хөтөлбөр Facebook групп https://www.facebook.com/groups/1878439722303833

Сургалтад бүртгүүлэх линк: https://forms.gle/CqYMPq2KvgGAnQ128