Маргааш буюу есдүгээр сарын 8-нд Засгийн газрын ээлжит хуралдаан хуралдах юм. Хуралдаанаар Байгаль, орчин аялал жуулчлалын сайд Н.Уртнасанг албан тушаалаас нь чөлөөлнө гэх мэдээлэл гараад байгаа билээ. Тэгвэл уг мэдээлэлтэй холбогдуулан БОАЖ-ын сайд Н.Уртнасан өөрийн цахим хуудаснаа "Өвөлжилтийн бэлтгэл, агаар орчны бохирдлын талаар бидэнд хийх ажил маш их байна. Хийж ч байна. Дахин дахин хэлэх хэрэг гардаг юм байна. Хариуцлагатай ажил хийж буй хүний хувьд зөвхөн бодлого шийдвэр, ажил л ярина. Хүний тухай болон бусад сэдвээр ярихгүй. Ажлаа л сайн хийцгээе. Чин сэтгэл, хичээл зүтгэлийг үнэлэх өдөр ирнэ. Бурууд бууж өгөхгүй! Даваад гарна. Өвөлжилтийн хурлын өмнө амжиж бичив" хэмээн бичжээ.
