Хан-Уул дүүргийн 21 дүгээр хороо, Жаргалантын аманд үерийн хамгаалалтын 1.8 км далан барьж буй. Тус байгууламжийг хоёр сувагтайгаар хийж байгаа бөгөөд эхний 800 ам метр далан бүрэн дуусаж, өнгөрсөн сард ашиглалтад орсон. Харин үлдсэн нэг км далангийн угсралтын ажлын явц 70 хувьтай үргэлжилж байна.

Энэ талаар Геодези, усны барилга, байгууламжийн газар ОНӨААТҮГ-ын Засвар, ашиглалтын албаны дарга Б.Бямбасайхан “Өнгөрсөн жилүүдэд Жаргалантын амны уулнаас их хэмжээний үер бууж, Эх, нярай, эмэгтэйчүүдийн үндэсний төв, Архивын ерөнхий газар, Иргэний нисэхийн ерөнхий газар, “Буянт-Ухаа 2” хороолол орчим үерт автах эрсдэл үүсдэг байсан. Иймээс манай байгууллагаас зураг төслийг нь боловсруулж, өнгөрсөн сард эхний ээлжийн 800 метр даланг ашиглалтад оруулсан. Харин үлдсэн нэг км үерийн даланг аравдугаар сарын 1-нд ашиглалтад оруулахаар ажиллаж байна” гэв.

Энэ онд Геодези, усны барилга, байгууламжийн газар ОНӨААТҮГ-аас 15 байршилд авто замын борооны ус зайлуулах шугам сүлжээ суурилуулах, найман байршилд үерийн хамгаалалтын далан сувгийг хүчитгэх, шинээр барих ажил хийж байгаа юм. Харин өнөөдрөөс Хан-Уул дүүргийн 3 дугаар хороо, Механик инженерийн сургуулийн хойно ус ихээр тогтдог байршилд авто замын борооны ус зайлуулах шугам сүлжээ угсралтын ажлыг эхлүүллээ. Мөн Хан-Уул дүүргийн 15 дугаар хороо, “Акуа гарден” хорооллын зүүн талд үерийн даланг хүчитгэх ажил хийнэ. Энэ хүрээнд төлөвлөгөөт шугам болон далан цэвэрлэгээг үе шаттайгаар хийж байгааг албаны хүмүүс онцоллоо.