Грек Улсад сүүлийн өдрүүдэд хэт халж, зарим бүс нутагт агаарын температур Цельсийн 47 хэм хүрч халсан байна. Хэт халалтын улмаас Грек улс урьд өмнө үзэгдээгүй байгалийн гамшигт нэрвэгдэж, орон даяар 586 түймрийн голомт шатаж байгаа бол хоёр дахь том арал Эвиа түймрийн гамшгийн голомт болж, арлын 50 гаруй хувь шатжээ.

Ерөнхий сайд Кирякос Мицотакис, түймрийг унтрааж чадахгүй байгаадаа ард иргэдээс уучлал гуйж, ОХУ-аас тусламж хүссэн байна.

ОХУ-ын ерөнхийлөгч Владимир Путин гал түймэртэй тэмцэх мэргэжилтнүүдийн багийг техник хэрэгслийн хамт Грек рүү илгээх захирамж гаргаж, Мягмар гарагийн орой тусламжийн эхний хэсэг болох Ил-76 онгоц Афиний олон улсын нисэх буудалд газарджээ.

Мөн хоёр дахь Ил-76 нисэх онгоц удахгүй Афинд газардах бол хоёр ширхэг Mи-18 нисдэг тэрэг ачсан АН-124 нисэх онгоц мөн Грект очихоор болжээ.

С.Сувдансондор