Эрүүл мэндийн сайд С.Энхболд хөл хорио сулруулах болсонтой холбогдуулан мэдээлэл хийх үеэр сэтгүүлчдийн асуултад хариуллаа.

-Коронавирусний вакцины хоёр тунг хийлгэсэн иргэдэд гэрчилгээ олгох уу?

-Вакцины хоёр тунд хамрагдсан иргэдэд QR код олгож, үйл ажиллагаа нь нээлттэй байгууллагуудаар үйлчлүүлэх боломжийг бүрдүүлнэ. Энэ асуудлыг эрдэмтдийн судалгаа, мэргэжлийн байгууллагын зөвлөмжид үндэслэн УОК-ын 21, 31 дүгээр журамд нэмэлт, өөрчлөлт оруулан тусгасан.

-Вакцинд хамрагдах боломжгүй эрүүл мэндийн шалтгаантай иргэдийн нийгмийн харилцаанд оролцох асуудлыг хэрхэн зохицуулах вэ?

-Вакцин хийлгэх боломжгүй хэсэгт жирэмсэн хүмүүс багтаж байгаа. Одоогоор 54 мянга орчим жирэмсэн хүн байна. Коронавирусний вакцин бол шинээр гараад удаагүй тул жирэмсэн эмэгтэйд хийж болох эсэх талаар албан ёсны дүгнэлт гараагүй.

-Жирэмсэн эмэгтэйчүүдээс гадна эрүүл мэндийн бусад шалтгаантай хүмүүст хийх боломжгүй гэсэн мэдээлэл бий?

-Мэдрэлийн хүнд эмгэгтэй, унадаг, татдаг хүмүүст хийж болох эсэхийг судалж байгаа.