Цаг уурын байгууллагын мэдээлснээр өнгөрсөн арав хоногт агаарын температур ихэнх нутагт олон жилийн дунджаас дулаан нийт нутгийн 90 хувьд хур тунадас дунджаас бага орсон байна. Харин 10 орчим хувь нь дунджийн орчим буюу түүнээс ахиу оржээ. Мөн арав хоногт нэг удаа хийдэг хээрийн цасны хэмжилтийн мэдээгээр энэ сарын 20-ны байдлаар нийт нутгийн 60 гаруй хувьд цастай байна. Цаг уурчдын хэлснээр энэ хавар огцом дулаарал ажиглагдахгүй бөгөөд ахиу цас орсон бүс нутгаар харьцангуй сэрүүн байх бол цас багатай газар харьцангуй дулаан байх нь. Тэгвэл цаг агаарын тав хоногийн урьдчилсан төлөвөөр, говийн аймгуудын нутгаар + 6 градус руу орж дулаарах аж.

Тэгвэл хээрийн цасны хэмжилтээр, Завханы Нөмрөг, Сонгино, Цагаанчулуут, Отгон, Баянхонгорын Гурванбулаг, Баянбулаг, Галуут, Сэлэнгийн Ерөө 22-32 см, бусад нутагт 1-10 см, гуу жалга хунгарласан газартаа 50 см хүртэл зузаан цастай байна. Мөн хангайн уулархаг бүс нутгаар буюу Алтай, Хангай, Хэнтий, Хөвсгөлийн нутаг, Тамсагийн хоолойгоор 20 см-ээс их байна.