Боловсролын ерөнхий газар, "Оюу толгой" ХХК-ийн Сургалтын хэлтэстэй хамтран “Мэргэжлээ крашлая” өдөрлөгийг Говь-Алтай аймагт 2023 оны есдүгээр сарын 21-ний өдөр зохион байгууллаа.

Суралцагчдад мэргэжлээ сонгоход нь туслах, ажил мэргэжлийн талаар сурталчлах зорилготой тус өдөрлөгт Говь-Алтай аймгийн ЕБС-ийн 8-12 дугаар ангийн сурагчид, МБСБ-ын суралцагчид, эцэг эх, асран хамгаалагч болон “Ажил мэргэжлийн чиг баримжаа олгох” салбар зөвлөлийн 3200 хүн оролцжээ.

Тус аймгийн АМЧБО салбар зөвлөлийн тэргүүн, АЗД-ын Тамгын газрын дарга Ш.Эрдэнэбат өдөрлөгийг нээж хэлсэн үгэндээ насан туршийн сайн сайхан амьдралын баталгаа болсон ирээдүйн ажил мэргэжлээ зөв сонгох хэрэгтэй бөгөөд хүн өөрийн авьяас чадвар, хүсэл сонирхлоороо сонгосон мэргэжилдээ илүү их амжилт гаргадаг бөгөөд энэ цаг үед дээд боловсролтой боловсон хүчнээс илүү өндөр цалин авдаг нарийн мэргэжилтэй, чадварлаг ажилчид их байгааг онцлон дурдаад хүүхэд бүр их дээд сургуульд элсэн орох гэж зүтгээд төгссөний дараа ажлын байр эрж хайхын оронд мэргэжилтэй ажилтан болж, эх орныхоо бүтээн байгуулалтад хувь нэмэр оруулах нь чухал байна гэдгийг хэлжээ.