“УБТЗ” ХНН-ийн дүрмийн санг 167,4 тэрбум төгрөгөөр нэмэгдүүлэх тухай Монгол Улс, ОХУ-ын Засгийн газар хоорондын хэлэлцээрийн дагуу ОХУ-аас нийлүүлэх гол замын 5 шинэ зүтгүүрийн эхний зүтгүүрээ хүлээн авлаа.

ЭРГЭН САНУУЛАХАД,

УИХ-ын дарга Г.Занданшатарын ОХУ-д хийсэн албан ёсны айлчлалын хүрээнд Зам, тээврийн хөгжлийн сайд С.Бямбацогт ОХУ-ын Тээврийн сайд В.Савельевтай уулзаж, "Орос-Монголын хамтарсан Улаанбаатар төмөр зам"-ыг байгуулах тухай хэлэлцээрт нэмэлт оруулах протоколд гарын үсэг зурсан.

Ингэснээр олон жил яригдсан МОН П1, П2 зээлийн хугацаа хэтэрсэн өр төлбөрийг цэгцлэх, дуусгавар болгох асуудлыг шийдвэрлэж чадсан юм.

Протокол байгуулагдсанаар:

• "Улаанбаатар төмөр зам" ХНН-ийн дүрмийн сан 167 тэрбум төгрөгөөр нэмэгдүүллээ.
• Улаанбаатар төмөр зам хугацаа хэтэрсэн өр ширгүй болж, парк шинэчлэлт, замын засвар, хөрөнгө оруулалтаа хийх эдийн засгийн чадвар нь эрс сайжирч, зээлжих зэрэглэл нь нэмэгдэж байна.
• Оросын талаас дүрмийн санд нийлүүлж буй 5 зүтгүүрийг авсанаар ачаа татах, тээх хүчин чадал 2 сая орчим тонноор нэмэгдэнэ. Экспортын болон транзит тээвэрт тээг саад болж байсан зүтгүүрийн дутагдал эрс багасна.
• Хоёр улсын хооронд үүсээд байсан нэг томоохон асуудал ийнхүү шийдвэрлэгдэж, цаашдын харилцаа, хамтын ажиллагааг өргөжүүлэхэд томоохон түлхэц болсон юм.

Хоёр талын тээврийн сайд нарын уулзалтын үеэр,

• Орос-Монгол-Хятад гурван улсыг хамарсан тээврийн коридорыг хөгжүүлэх, тээвэрлэх ачааны хэмжээг 60 сая тоннд хүргэх,
• Эдийн засгийн коридорын хүрээнд "Богдхан" төмөр замын төслийг эхлүүлэх, Хөшигтийн хөндийн тээвэр ложистикийн төвийг гол төмөр замд холбох,
• Зүүн босоо тэнхлэгийн төмөр замын Эрээнцав-Чойбалсан хэсэглэлийн их засвар, шинэчлэлийн ажлыг эхлүүлэх,
• АН-3, АН-4 автозамаар явж буй транзит тээврийн хэмжээг нэмэгдүүлэх,
• Агаарын харилцааны хэлэлцээрт нэмэлт өөрчлөлт оруулж хязгаарлалтуудыг багасгах зэрэг багтсан юм.