Зүүнбаян-Гашуунсухайт чиглэлийн төмөр зам 2008-2019 он хүртэл баригдаагүй шалтгаан, алдагдсан боломжийг тооцож, шалгалтын баг оруулах Ерөнхий сайдын шийдвэрийн үргэлжлэл болгож өнөөдрийн Засгийн газрын ээлжит хуралдаанаар эл хэргийг шалгах ажлын хэсэг байгуулж, ХЗДХ-ийн сайд Х.Нямбаатар ахлахаар болсон.

Ингэхдээ төмөр замтай холбогдуулан Ерөнхийлөгч асан Х.Баттулгыг шалгана гэсэн үг. Учир нь уг төмөр замын ажлыг эхлэхэд өргөн нарийн цариг ярьж гүйцэтгэлийн ажлыг нь зогсоосон. Түүнчлэн төрөөс төмөр замын талаар баримтлах бодлогын баримт бичгийг боловсруулсан гээд өнгөрсөн хугацаанд төмөр замтай холбоотой бүхий л ажил Ерөнхийлөгч асан Х.Баттулгатай холбогддог билээ.

Тэгвэл Засгийн газрын нэр дээрээс стратегийн төслүүдийг санаатайгаар гацааж, хорлон сүйтгэх үйл ажиллагаа явуулсан гэх үндэслэлээр хуулийн байгууллагуудад өргөдөл, гомдол өгөхөөр болжээ. Мөн 2008-2019 оны хооронд төмөр зам тавигдаагүй, гацсантай холбоотой алдагдсан боломжийг тооцож нэхэмжлэх аж.