Реппер Mrs.M-ийн к-поп айдол Хюнинг Кай бэлгийн чиг хандлагаар доромжилсон асуудал сөхөгдөж, "Super Concert: Special" тоглолтод оролцохгүй боллоо

Тодруулбал, Mrs.M 2020 онд инстаграм хуудсандаа к-поп айдол Кайн зургийг "Эрэгтэй хүн ийм хөөрхөн байж болохгүй. Ямар ч эршүүд юм алга аа. Нөгөө юу муу нь байдаг юм уу гэмээр л байна" гэсэн тайлбартайгаар стори хийсэн байдаг. Эл сториг нийтлэгдсэний дараа "ТХT Mongolians" фэйсбүүк хуудсаар Mrs.M-ийг "Кайн нэр хүндэд халдаж, мөн бэлгийн дарамт учруулсан, "Big Hit"-рүү и-мэйл илгээнэ" хэмээн нийтлэл бичиж, үүнийг нь к-попын шүтэн бишрэгчид цахим орчинд түгээж, давлагаалж байв.

Тэгвэл 2026 оны есдүгээр сарын 19-нд болох PSY, Baek Z Young, Leehi тэргүүтэй дэлхийн хэмжээний артистууд оролцох "Super Concert special"-д реппер Mrs.M оролцохоор болсныг зарласны дараа дээрх асуудал дахин сөхөгджээ. Улмаар к-попын фэнүүд "Super Concert"-ыг зохион байгуулагч "Evandis Entertainment"-д түүнийг тоглолтоос хасахыг шаардсан байна.

Харин "Super Concert: Special"-д оролцох уран бүтээлчдийг зарласан сүүлийн мэдээллээс харахад Mrs.M өөрийн хүсэлтээр оролцохоос татгалзсан байна.