“Талын салхи” олон улсын мото фестиваль өнөөдөр буюу зургадугаар сарын 11-нд Сүхбаатарын талбайд 14.30 цагаас нээлтээ хийгээд байна. Уг арга хэмжээнд Ерөнхийлөгч У.Хүрэлсүх Ерөнхий сайдаар ажиллаж байхаасаа оролцож эхэлсэн түүхтэй. Тэгвэл энэ удаагийн арга хэмжээнд оролцох эсэх нь тодорхойгүй байна. Фестивальд оролцогчид “Буянт-Ухаа” цогцолбор-Хүннү молл-Уулын зам–Наадам центр-Сүхбаатарын талбай гэсэн маршрутаар явах учир эдгээр чиглэлд 12:00-14:00 цагийн хооронд хэсэгчилж зам хаах юм байна.

Энэ үеэр ховор нандин мотоциклын үзэсгэлэн, үзүүлэх тоглолт, мотоцикл болон дагалдах хэрэгслийн худалдаа, хоол үйлчилгээ, циркийн үзүүлбэр, урлагийн тоглолт болох юм байна. Энэ удаагийн фестивалийг “Эрүүл хүн-Архигүй Монгол” уриан дор зохион байгуулж байгаа бөгөөд орон нутгийн болон монгол туургатан улсуудын төлөөлөл 100 гаруй мотоцикл сонирхогчид оролцох юм.

Ташрамд дурдахад, уг арга хэмжээг Нийслэлийн Засаг даргын Тамгын газар, Нийслэлийн Аялал жуулчлалын газар, Улаанбаатар чуулга, “Монголын чопперчин ахан дүүс” НҮТББ-тай хамтран мотоцикл сонирхогчдын дунд уг фестивалийг зохион байгуулж байгаа юм байна.