Нийслэлийн статистикийн газраас долоо хоног бүр зах худалдааны төвүүдэд худалдаалж буй өргөн хэрэглээний бараа бүтээгдэхүүний үнэ ханшийг танилцуулдаг. Өмнөх долоо хоногтой харьцуулахад үхрийн цул махны үнэ нэг хувиар буурч килограмм нь дунджаар 22628 төгрөг болжээ. Тэгвэл үхрий ястай мах килограмм нь 19911 төгрөг болсон нь 0.04 хувиар буурсан үнэ юм. Мөн хонины ястай мах килограмм нь 17375 төгрөгийн үнэтэй байна.

Мах, махан бүтээгдэхүүний үнэ өмнөх оны мөн үеэс 21 хувиар өссөн бөгөөд энэ нь сүүлийн 2-3 жилийн дунджаас хоёр дахин өндөр өсөлттэй байгаа юм. Үүний шалтгаан нь нийлүүлэлтийн хомсдол бөгөөд өнгөрсөн өвөл зудын улмаас 9.4 сая мал хорогдсоноос мах нядалгаа багасаж, нийлүүлэлт буурсан байна. Мөн намрын сүүл, өвлийн эхэн сард дулааралт ажиглагдсанаас мах нядалгааны хугацаа сунжирч, хөлдүү махны нөөц багассан нь үнийн өсөлтөд нөлөөлжээ. Үүнээс гадна мах хадгалдаг зоориудын түрээсийн үнэ хоёр дахин нэмэгдсэн нь үнийн өсөлтөд нөлөөлсөн байна. Монголбанкны мэргэжилтнүүдийн тооцсоноор махны үнэ зургадугаар сар хүртэл өсөх хандлагатай байгаа аж.