Улаанбаатар хотын хамгийн олон хүн амтай дүүргийн нэг бол Сонгинохайрхан. Тус дүүргийн нийт 19 хороонд сургууль байхгүй гэсэн тооцоолол гарчээ. Иймд 11 байршилд сургууль барихаар төлөвлөсөн болохыг дүүргийн Засаг даргын орлогч Д.Хосбаяр ярьж байлаа. Мөн цэцэрлэгийн хүртээмжийг ч нэмэгдүүлэхэд анхаарч байгаа аж.

Тухайлбал, Сонгинохайрхан дүүргийн 43 дугаар хороонд улсын төсвийн хөрөнгө оруулалтаар 150 хүүхдийн ортой цэцэрлэгийн барьж байна. Уг цэцэрлэгийн барилгын ажил 85 хувийн гүйцэтгэлтэй үргэлжилж байгаа аж. Өнөөдрийн байдлаар шинэ цэцэрлэгийн дотор засвар болон гадна тохижилтын ажлуудыг хийж байна. Тус ажлыг 2025 оны хичээлийн шинэ жилд хүлээлгэж өгөхөөр “Их каркас констракшн” ХХК гүйцэтгэж байна.