АНУ-ын Үндсэн хуулийн дагуу Конгрессын нээлтийн ёслолын нэгдсэн хороо монголын цагаар өчигдөр 00.00 цагт АНУ-ын 47 дахь Ерөнхийлөгч Д.Трампын Тангараг өргөх ёслолын ажиллагааг зохион байгуулав. Ёслолын ажиллагаа шинэ Ерөнхийлөгч тангарагаа өргөж, мэдэгдэл хийсний дараа ёслолд оролцсон зочдод “Blair House”-д хүндэтгэлийн зоог барив. Тангараг өргөх ёслолын ажиллагаа гурван гол “Inaugural Ball” арга хэмжээгээр үргэлжилж байна.

Цагаан ордны түүхийн нийгэмлэгийн мэдээлснээр, хамгийн анхны “Inaugural Ball” арга хэмжээг 1809 онд Ерөнхийлөгч Жеймс Мэдисон болон түүний эхнэр Долли нарт зориулан зохион байгуулж байжээ. Уг арга хэмжээнд ахмад дайчид, Ерөнхийлөгчийг дэмжигчид болон бизнесийн төлөөллүүд илтгэл тавьж, уран бүтээлчид ая дуугаа өргөдөг байна.

“Commander in Chief Ball”

Тус улсын цэргийн алба хаагчид, ахмад дайчид болон тэдний гэр бүлд хүндэтгэл үзүүлдэг байна. Энэхүү арга хэмжээнд каунтри хамтлаг “Rascal Flatts” болон дуучин, ая зохиогч Паркер МакКоллум нар ая дуугаа өргөх аж.

“Liberty Inaugural Ball”

Д.Трампын гэр бүл, намын гишүүд зэрэг түүний ойрын хүрээллийн зочид уригдсан бөгөөд дуучин, ая зохиогч Жейсон Алдин реппер Нелли-ийн хамтаар урлагийн үзүүлбэр үзүүлэхээр бэлдсэн байна. Уг арга хэмжээнд Элчин сайд Ө.Батбаяр оролцож байна.

“Starlight Ball”

Энэхүү арга хэмжээнд шинэ Ерөнхийлөгчийн сонгуулийн үйл ажиллагаанд хандив өгсөн улс төр, бизнесийн салбарынхан оролцох бөгөөд поп дуучин, ая зохиогч Гэвин ДэГро дуулна. Ерөнхийлөгч Д.Трамп дээрх гурван арга хэмжээнд үг хэлснээр Тангараг өргөх ёслолын ажиллагаа өндөрлөх юм.