Ажлын таван өдрийн турш хүн бүр өөр өөрийн ажил, хичээл, завгүй амьдралын хэмнэлээр амьдардаг. Харин амралтын хоёр өдөр бол гэр бүлийнхэн нэг дор цуглаж, бие биедээ цаг гаргах боломжтой ховорхон мөчүүдийн нэг.

Гэхдээ хамтдаа байна гэдэг заавал үнэтэй газар очиж, томоохон аялал хийхийг хэлэхгүй. Заримдаа гэртээ хамт хоол хийх, орой нь кино үзэх, хүүхэдтэйгээ ном унших зэрэг энгийн зүйл хамгийн сайхан дурсамжийг үлдээдэг.

Тэгвэл энэ амралтын өдрөөр гэр бүлээрээ хийж болох хэдэн санааг хүргэе.

-Хамтдаа өглөөний цайгаа бэлдэх Амралтын өдрийн өглөөг яарч сандралгүй эхлүүлээрэй-

Хүүхдүүдтэйгээ хамт өглөөний цайгаа бэлдэж, ширээгээ засаж, нэг дор сууж хооллох нь гэр бүлийнхэнд ярилцах боломж өгнө. Хүүхдэд насанд нь тохирсон жижиг ажил хариуцуулахад өөрийгөө гэр бүлийн нэг хэсэг гэдгээ мэдрэхэд ч тустай.

Гэр бүлийн “кино үдэш” зохион байгуулах

Хүн бүрийн үзэхийг хүссэн киног ярилцаад нэгийг нь сонгоно. Дэргэд нь дуртай амттан, халуун ундаагаа бэлдээд гэрийнхээ жижигхэн кино театрыг өөрсдөө бий болгож болно. Хамгийн гол нь кино дууссаны дараа “Чамд аль хэсэг нь таалагдсан бэ?” гэж хүүхдүүдээсээ асууж, ярилцаарай. Ингэснээр зүгээр нэг кино үзсэнээс илүү гэр бүлийн ярианы нэг хэсэг болно.

-Хамтдаа хоол хийж үзэх Амралтын өдрийн нэг хоолыг бүхэл бүтэн гэр бүлээрээ хийхээр тохироод үзээрэй-

Хүүхдүүддээ ногоо угаах, орц бэлдэх, ширээ засах зэрэг насанд нь тохирсон ажил өгч болно. Хоол хийх үеэр хүүхдүүдтэй ярилцахад ч амархан байдаг. Өдөр тутам “Хичээл ямар байсан?” гэж асуухаас илүү хамтдаа ямар нэг зүйл хийж байх үед яриа өөрөө өрнөх боломжтой. Мөн хүүхэд хоол хийх явцдаа хэмжих, унших, дараалал баримтлах зэрэг олон чадварыг давхар сурдаг.

-Гэр бүлээрээ ном унших цаг гаргах-

Гэр бүлийн гишүүн бүр өөрийн дуртай номоо сонгоод тодорхой хугацаанд хамтдаа чимээгүй ном уншиж болно. Бага насны хүүхэдтэй бол ээлжилж чангаар унших, зураг дээрх үйл явдлыг ярилцах байдлаар сонирхолтой болгож болно. Хамгийн чухал нь хүүхдэд “ном унших бол ганцаараа хийх ёстой хичээл” гэхээс илүү гэр бүлийн хамтын дадал гэдгийг мэдрүүлэх юм. Хамтдаа ном унших нь зөвхөн унших чадварт бус, эцэг эх, хүүхдийн хоорондын харилцаанд ч эерэг орон зай бүрдүүлдэг.

-Гадаа гарч, хамтдаа алхах Заавал холын аялал төлөвлөх шаардлагагүй-

Ойролцоох цэцэрлэгт хүрээлэнгээр алхах, дугуй унах, тоглоомын талбайд тоглох, байгальд гарах зэрэг энгийн зүйлс хангалттай. Утас, зурагтнаас хэсэг хугацаанд холдож, алхах зуураа ярилцаарай. Хүүхэд тань юу сонирхож байгаа, ямар зүйлд дуртай болсон, сургууль цэцэрлэг дээр нь юу болж байгааг асуухад энэ цагийг ашиглаж болно.

-Гэр бүлээрээ тоглоомын орой хийх-

Ширээний тоглоом, хөзөр, эвлүүлдэг тоглоом, таавар, “хэн нь хурдан бэ?” гэх мэт тоглоомоос сонгож болно. Хүүхдүүдтэйгээ тоглохдоо заавал ялуулах гэж оролдохын оронд хамтдаа инээж, хөгжилдөх нь гол. Заримдаа хүүхэд эцэг эхээсээ үнэтэй тоглоом биш, зүгээр л хамт тоглохыг хүсдэг.

-Гэр бүлийн жижиг аялал төлөвлөх-

Хэрэв цаг, боломж байвал хотын ойролцоох байгальд гарах, шинэ газар очих, музей үзэх, амьтны хүрээлэнгээр зочлох гэх мэт жижиг аялал зохион байгуулж болно. Хүүхдүүддээ хаашаа явах, юу хийхээ сонгох боломж өгвөл бүр сонирхолтой. Ингэснээр амралтын төлөвлөгөө зөвхөн эцэг эхийн гаргасан шийдвэр биш, бүх гэр бүлийн хамтын сонголт болно.

-Гэр бүлийн “утасгүй цаг” бий болгох-

Өнөөдөр нэг гэрт амьдардаг хүмүүс хүртэл өөр өөрийн дэлгэц рүүгээ хараад суух нь түгээмэл. Тиймээс оройн хоолны үеэр эсвэл нэг цагийн турш утсаа хол тавих жижиг дүрэм хэрэгжүүлээд үзээрэй. Тэр хугацаанд гэр бүлийнхэн нэг нэгнээсээ тухайн долоо хоногт болсон хамгийн хөгжилтэй, хамгийн сайхан, эсвэл хамгийн хэцүү зүйлээ асууж болно.

-Ням гарагийн оройгоо хамтдаа тайван өнгөрөөх-

Амралтын өдөр дуусах гэж байгаад харамсахын оронд Ням гарагийн оройг гэр бүлийн тайван цаг болгоорой. Хамтдаа оройн хоол идэж, дараагийн долоо хоногийн төлөвлөгөөгөө ярилцаж, хүүхдүүдийнхээ хийх зүйлсийг сонсож болно. Хамгийн гол нь амралтын өдрийг “юу их амжуулсан бэ?” гэж хэмжихээс илүү “хэнтэйгээ хэр их цагийг чанартай өнгөрөөсөн бэ?” гэж бодоод үзээрэй. Учир нь хүүхэд том болоод эцэг эх нь тухайн өдөр хэдэн төгрөг зарцуулсныг биш, хамтдаа хоол хийсэн, тоглосон, инээлдсэн, ярилцсан тэр мөчүүдийг илүү тод санах нь бий.

Тиймээс энэ амралтын өдрөөр заавал хол явах, их мөнгө зарцуулах шаардлагагүй. Хамгийн энгийн зүйлсийг гэр бүлээрээ хамт хийхэд л амралтын хоёр өдөр илүү дотно, дулаан, дурсамжтай өнгөрч чадна.