Монгол Улсын 2025 оны нэгдсэн төсвийн төслийн хэлэлцүүлэг УИХ, байнгын хороодод үргэлжилж байна. Дахин өргөн барьсан эл төсвийн төсөлд урсгал зардлыг 25.3 их наяд байхаар тооцоолсон байдаг. Тэгвэл зардлыг бууруулсан байдалд аудитын байгууллага дараах дүгнэлтийг өгчээ. Тодруулбал, "Төсвийн урсгал зарлагыг хумьж, зарим хэрэгжиж эхлээгүй хөтөлбөр, үйл ажиллагааг зогсоохоор төлөвлөсөн нь төсвийн зарлагын ДНБ-д эзлэх харьцааг бууруулсан сайн талтай боловч зардлыг хэт механикаар хассан нь 2025 онд төрийн үйлчилгээний чанар, хүртээмжийг бууруулах, тоо хэмжээг хумих эрсдэл үүсэх магадлалтай байна" гэжээ.