Энэ мэдээ хуучирсан буюу 2024/05/16-нд нийтлэгдсэн мэдээ болно.

“Гар утас руу нь харсан“ гэх шалтгаанаар сурагчаа зодсон багшид 10 хоног баривчлах шийтгэл оноожээ

Ангилал
 Хууль эрх зүй
Огноо
Унших
2 минут 43 секунд

Баян-Өлгий аймагт ... дугаар сургуулийн багш 10-р ангийн сурагчийг зодсон асуудал гарсан. Тодруулбал,

Багш Х нь 2023 оны 11 дүгээр сарын 28-ны өдрийн 11:00 цагийн орчимд сургуулийн хичээлийн байранд 10в ангийн сурагч Ц-г “Миний утас руу өндийж харж, миний хувийн орон зай руу халдлаа” гэх шалтгаанаар нүүрэнд нь нэг удаа, хөлийн шилбэ хэсэгт хоёр удаа хөлөөрөө өшиглөж, шилэн хүзүүнд нь гараараа нэг удаа алгадаж биед нь халдаж, танхайрсан зөрчилд холбогдсон. Тэгвэл эл асуудлыг Баян-Өлгий аймаг дахь сум дундын эрүүгийн хэргийн анхан шатны шүүх шийдвэрлэсэн байна.

Хуульд зааснаар танхайрах зөрчлийн үндсэн шинжийг (1) олон нийтийн газарт, эсхүл орон байранд, (2) хэрүүл маргаан үүсгэж, (3) биеэ авч явах нийтээр хүлээн зөвшөөрөгдсөн хэм хэмжээг зөрчсөн байхаар хуульчилсан бөгөөд багш Х-гийн дээрх үйлдэл нь олон нийтийн газарт буюу сургуулийн хичээлийн байранд үйлдэгдсэн, хуулийн 6.20 дугаар зүйлийн 7 дахь хэсэгт заасан “Хүүхдийн бие махбодод халдах” болон Зөрчлийн тухай хуулийн 5.2 дугаар зүйлийн 1 дэх хэсэгт заасан “Танхайрах” зөрчлийн шинжийг тус тус хангажээ.

Зөрчлийн тухай хуулийн 5.2 дугаар зүйлийн 1 дэх хэсгийн 1.1, 1.3, 1.4-т “Олон нийтийн газар хэрүүл маргаан үүсгэж, бусдын амгалан тайван байдал алдагдуулж, олон нийтийг үл хүндэтгэсэн ... бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна” гэж, мөн хуулийн 6.20 дугаар зүйлийн 7-д “Хүүхдийн бие махбодод халдсан, ... нь эрүүгийн хариуцлага хүлээлгэхээргүй бол хүнийг гурван зуун нэгжтэй тэнцэх хэмжээний төгрөгөөр торгоно” гэж тус тус заажээ.

Шүүхээс “Х”-ийг танхайрах зөрчил үйлдсэн, хүүхдийн бие махбодод халдсан гэж дүгнэж, тухайн иргэний үйлдсэн зөрчлийн хэргийн шинж, үйлдэгдсэн нөхцөл байдал, хувийн байдал зэргийг харгалзан үзэж, 20 /хорин/ цагийн албадан сургалтад хамруулж, 10 /арван/ хоногийн хугацаагаар баривчлах шийтгэл оногдуулж шийдвэрлэсэн байна.

Говь-Алтай аймаг ганц бие залуусын “ДӨРГӨНИЙ ЭРЭГ ДЭЭРХ 24/7” уулзалтыг зохион байгуулна
Говь-Алтай аймаг ганц бие залуусын “ДӨРГӨНИЙ ЭРЭГ ДЭЭРХ 24/7” уулзалтыг зохион байгуулна
 
“Хүннү 2222” хорооллын ус соруулах насосын ашиглалтыг ГУББГ хариуцахаар боллоо
“Хүннү 2222” хорооллын ус соруулах насосын ашиглалтыг ГУББГ хариуцахаар боллоо
АНХААРУУЛГА: Уншигчдын бичсэн сэтгэгдэлд UBN.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй. !
UBN.mn сайтын редакц