УИХ-ын Нийгмийн бодлогын байнгын хороо өнөөдөр хуралдлаа. Хуралдаанаар Гепатитын Д вирусийн халдвартай иргэдэд үзүүлж буй тусламж, үйлчилгээний өнөөгийн байдал, цаашид хэрэгжүүлэх арга хэмжээний тухай хэлэлцсэн юм.

Энэ үеэр УИХ-ын гишүүн Т.Аубакир асуулт асууж, байр сууриа илэрхийлэв. Тэрбээр "Тэтгэврийн насанд хүрээгүй ЗАВСРЫН хүмүүс байгаа юм. Тэтгвэрт гарах гэхээр "Чи залуу байна, болоогүй" гэдэг. Ажилд оръё гэхээр "Та хөгшин байна" гээд буцаадаг.

Яг энэ хүмүүсийн гарт ямар нэг орлого байхгүй. "Энэ улс биднийг яах юм бэ" гэсэн иргэн олон байна. Би энэ байнгын хорооны гишүүн биш ч гэсэн нийгмийн асуудал учраас НББХ хариулах юм уу, яах юм. Маш олон иргэн утсаар ч хэллээ. Уулзахад ч хэлсэн. Эдгээр хүмүүсийг өөрсдөө учраа ол гээд хаях юм уу. Яасан айхтар инээж байна аа, та нар" хэмээлээ.

Харин УИХ-ын гишүүн, НББХ-ны дарга П.Анужин "Т.Аубакир гишүүн маш чухал гурван асуудлыг ярьж байгаа ч танай байнгын хороо хэлэлцэх асуудалтайгаа хамаагүй зүйлийг ИРГЭДИЙН ХҮСЭЛТ гээд ярьдгийг мэдэхгүй юм. Дэгийн дагуу таны асуултад одоогоор хариулах боломжгүй байна" гэх тайлбарыг өгсөн юм.