Монгол Улсын Их Хурлын 2022 оны 04 дүгээр сарын 15-ны өдрийн 14 дүгээр тогтоолоор байгуулагдсан “Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар хянан шалгах үүрэг бүхий түр хороо”-ны Нотлох баримтыг шинжлэн судлах гурав дахь шатны сонсгол өнөөдөр /2023.02.08/ Төрийн ордонд эхэллээ.

Хүнс хөдөө аж ахуйн салбарт хэрэгжсэн газар тариалангийн бүтээгдэхүүний агуулах барих төслийн танилцуулгыг шинжээч хийлээ. Эл төслийн нийт өртөг 16 тэрбум төгрөг бөгөөд 8 тэрбум төгрөг нь ХБ-наас үлдсэн 8 тэрбум төгрөг нь улсын төсвөөс гарсан байдаг. Дүгнэлтэд 1982-1983 онд ашиглалтад орсон хуучин объектыг бусад ижил хүчин чадалтай объектуудын үнэлгээтэй харьцуулахад 3 дахин өндөр үнээр худалдан авсан гэжээ. Дотоод аудитын дүгнэлттэй холбоотойгоор эл асуудал хууль хяналтын байгууллагаар шалгагдаж байгаа аж.