Олон арван жилийн турш хүүхэлдэйн кино, телевизийн цуврал болон кино урлагт дуу хоолойгоороо дүрүүдийг амилуулж, дэлхийн олон орны үзэгчдийн хайр хүндэтгэлийг хүлээсэн уран бүтээлч Питер Каллен 85 насандаа таалал төгслөө.

Тэрбээр Transformers франчайзын Оптимус Прайм дүрд 40 гаруй жилийн турш дуу оруулсан гэдгээрээ дэлхий даяар хамгийн их танигдсан нэгэн юм. Түүний хүчирхэг, итгэл төрүүлэм дуу хоолой Оптимус Праймын дүрийн салшгүй нэгэн хэсэг болж, хэд хэдэн үеийн үзэгчдийн дурсамжид үлджээ.

Үүгээр ч зогсохгүй Winnie the Pooh хүүхэлдэйн киноны Eeyore, Chip 'n Dale: Rescue Rangers-ийн Монтерей Жек, Voltron-ы Коран зэрэг олон алдартай дүрд дуу оруулж байв. Мөн Predator кинонд дүрийн өвөрмөц дуу авиаг бүтээхэд оролцсон нь түүний уран бүтээлийн нэгээхэн хэсэг юм.

Каллены өвөрмөц, хүчирхэг атлаа дулаан өнгө аястай дуу хоолой олон дүрд өөрийн гэсэн өнгө төрхийг бий болгож, үзэгчдийн сэтгэлд хоногшсон байдаг.

Түүний дуу хоолойгоор амилсан дүрүүд өнөөдөр ч дэлхийн олон орны үзэгчдийн дурсамжид амьдарсаар байна. Олон арван жилийн турш кино, хүүхэлдэйн ертөнцөд үнэтэй хувь нэмэр оруулсан Питер Каллены уран бүтээлийн өв үе үеийн үзэгчдийн дунд хадгалагдан үлдэх нь дамжиггүй.