Өнгөрсөн 2020 оны дөрөвдүгээр сарын 3-нд Завхан аймгийн Улиастай суман дахь нэгэн орон сууцанд нэр бүхий дөрвөн иргэн архидан согтуурах үедээ хувийн тааламжгүй харилцаа үүссэнээс болж нэгнийхээ амь насыг хөнөөсөн хэрэг гарсан билээ. Тодруулбал, уг хэргийг Завхан аймаг дахь Эрүү, иргэний хэргийн давж заалдах шатны шүүхийн шүүгч асан Б.Намхайдорж үйлдсэн гэж гэрчүүдийн мэдүүлэг болоод нотлох баримтаар баталгаажсан байдаг. Тиймээс хэргийг прокурорт шилжүүлжээ. Хэрэг гарах үед шүүгч асан Б.Намхайдорж иргэн Н-той ноцолдох үеэрээ цонхоороо түлхэн унагасан байна. Түүнд Эрүүгийн хуулийн 10.1.1 дэх хэсэгт заасан “Хүнийг алсан бол 8-15 хүртэл хугацаагаар хорих ял шийтгэнэ” зүйл заалтаар яллах дүгнэлт үйлдсэн байна.