УИХ-ын гишүүн Г.Амартүвшин, Х.Ганхуяг, Н.Алтанхуяг, Ё.Баатарбилэг нарын бүрэн эрхийг түдгэлзүүлэх асуудлаар Халдашгүй байдлын дэд хороо хуралдаж, бүрэн эрхийг нь түдгэлзүүлэх шаардлагагүй гэж үзлээ. Уг санал дүгнэлтийг одоо ХЗБХ, ТББХ-ны хуралдаанаар хэлэлцэж, чуулганы нэгдсэн хуралдаанд танилцуулах аж.

Улмаар чуулганы нэгдсэн хуралдаанаар эцэслэн шийдвэрлэх юм байна. Энэ талаар Халдашгүй байдлын дэд хорооны дарга Н.Энхболд "Халдашгүй байдлын дэд хорооноос гишүүдийн бүрэн эрхийг түдгэлзүүлэх ШААРДЛАГАГҮЙ гэж үзлээ. АТГ-аас гишүүдийг нэг удаа дуудаж уулзсан. Гишүүд мөрдөн шалгах ажиллагаанд саад учруулаагүй байна. Мөн тодруулах зүйлсүүд байна. Тиймээс Ерөнхий прокурорын саналыг энэ удаад татгалзаж шийдвэрлэлээ. Дэд хороо санал дүгнэлтээ ХЗБХ, ТББХ-нд хүргүүлнэ. Тэндээс гарсан саналыг чуулганы нэгдсэн хуралдаанаар хэлэлцэж шийдвэрлэнэ" гэсэн юм.