Хэдхэн хоногийн өмнө Азийн шилдэг каунтри дуучин гэх эрхэм алдрын эзэн болж, монгол түмнээ баярлуулсан О.Энх-Эрдэнийг UBN сайт онцолж байна. Анх 20 настайдаа “Авьяаслаг монголчууд” шоуны ялагч болж, өвөрмөц хоолой, чадварлаг дуулалтаараа олонд танигдсан О.Энх-Эрдэнэ сүүлийн жилүүдэд тив дэлхийн чанартай шоу, арга хэмжээнд уригдаж, амжилт бүтээлээрээ ард түмнийхээ хайр хүндэтгэлийг хүлээгээд буй юм.

-Азийн шилдэг каунтри дуучин болсонд баяр хүргэе. Сэтгэгдлээсээ хуваалцаач?

-Мэдээж сайхан байна. Хэдэн тэрбумаар тоологдох азиуд дундаас намайг онцолж, надад энэ шагналыг өгсөнд маш их баярлаж байна.

-"The knigths awards"-ын талаар товчхон мэдээлэл өгөөч?

-Нийгмийн хөгжилд онцгой хувь нэмэр оруулж буй салбар салбарын шилдэг хүмүүс, корпорацуудыг алдаршуулдаг "The knigths awards" ёслол энэ сарын 14-нд Малайзын Филармонийн танхимд болсон. Энэ жил 40 гаруй улс оролцсон. Энэ том, нэр хүндтэй энэ шалгаруулалтад оролцож, "The Outstanding Country of the Year" номинацид нэр дэвшээд, Азийн шилдэг каунтри дуучнаар шалгарч чадсандаа маш их баяртай байгаа.

-Олон улсын чанартай томоохон арга хэмжээнд Монгол Улсаа төлөөлж оролцоход ямар мэдрэмж төрдөг вэ?

-Хүссэн хүн бүр гарч чаддаггүй тэр том тайзан дээр гараад улсынхаа нэрийг, аавынхаа нэртэй хамт дуудуулах миний хувьд хамгийн том бахархал байдаг. Илүү их хичээх ёстой юм байна. Өнөөдрийг хүртэл хичээж, зүтгэсэн зүтгэл, зам мөр минь зөв л байгаа юм байна. Мөрөөдөлдөө хүрэхэд нэг алхам ойртож байна даа гэж боддог.

-Азийн шилдэг каунтри дуучин болоод тэр том тайзан дээр зогсож байхад хамгийн түрүүнд ямар бодол төрсөн бол?

-Юун түрүүнд төрүүлж өсгөсөн ээж, аавдаа маш их баярласан. Хоёрдугаарт, өдийг хүртэл хийсэн зүйл минь зөв байж, хичээл зүтгэлийн минь үр дүн гарч байна даа гэcэн бодол төрж, зорьсон зорилго минь тийм ч хол биш юм шиг санагдсан.

-Өмнө нь гаднын хоёр ч том шоунд урилгаар оролцсон. Энэ удаад Азийн шилдэг дуучин боллоо. Цаашдын төлөвлөгөө нь юу бол. Гаднын зах зээлд хүч үзэх бодол бий байх?

-АНУ-д хоёр тэмцээнд орсон. Хамгийн сүүлд “America’s Got Talent: Fantasy League” тэмцээнд оролцож шилдэг 16-д шалгарсан. Энэ нь дэлхий даяар зохион байгуулагдсан бүх Got Talent тэмцээнүүдийн финалд үлдсэн оролцогчдоос 40 хүнийг сонгож өрсөлдүүлдэг, дөрвөн шүүгч өөрсдийн багтаа авч бэлддэг онцлогтой дугаар юм байсан. Зорилгын хувьд АНУ-ыг барууныг зорьж байгаа. Одоогоор манай багийн АНУ-д нэг төсөл эхлүүлчихсэн ажиллаж байна. АНУ-д каунтри гэдэг нь манайхаар бол ардын дуу шиг болчихсон зүйл. Тэр өрсөлдөөнд нэг Ази хүн орно гэдэг нь өөрөө маш том процесс. Азиудад, тэр дундаа Монгол залуучууддаа илүү их боломж байгаа шүү гэдэг тэр их итгэлийг, гэрлийг өгөхийг зориод явж байна.

-Дотоодын зах зээлд уран бүтээлчийнхээ хувьд юуг төлөвлөж байна вэ. Шинэ уран бүтээл, цомог, тоглолт гээд ямар төлөвлөгөө байна. Хүлээлт ч их байх шиг байна?

-Яг одоо бол "Амьдрал баян" гээд цомог маань гарчихсан байна. АНУ явахаасаа өмнө тоглолтоо хийсэн. Мэдээж монголдоо амьд хөгжмийг илүү дэлгэрүүлэх, каунтри гэдэг энэ төрлийг Монгол ахуйтайгаа холбоод Монголчуудад ойрхон төрөл жанрыг гаргаж ирэх зорилготой байгаа. АНУ-д хийж байгаа төслөөс шалтгаалаад монголдоо шинэ уран бүтээлүүд хийж арай амжихгүй байна. Гэхдээ ойрын хугацаандаа бол хуучны сайхан монгол дуунуудаа сэргээж дуулахаар төлөвлөж байна. Миний хувьд ийм сайхан дуу уран бүтээлүүд байдаг шүү гэдгийг сэргээн сануулж, залуучууддаа таниулах нь их сайхан санагддаг.

-ДУУЧИН BX-ИЙН "MY LOVE" ДУУ АРАМБИ ПОП УРСГАЛЫН ДУУ. ЭНЭ ДУУГ КАУНТРИ БОЛГОЖ ДУУЛНА ГЭДЭГ ТӨСӨӨЛӨХӨД Ч

ХЭЦҮҮ БАЙСАН-

-Дуучин BX-ийн "MY LOVE" дууг сэргээж дуулсан. Энэ саналыг яаж хүлээж авсан бэ?

-"New star music studio"-гийн 20 жилийн ойд зориулж каунтри өнгө аястай болгон сэргээж дуулсан. Энэ дуу бол дуучин BX-ийн хамгийн супер хитүүдийнх нь нэг. Арамби поп урсгалын дууг каунтри болгож дуулна гэдэг төсөөлөхөд ч хэцүү байсан ч ард нь гарсан. Энэ дууг нь ганцхан удаа дахин давтагдашгүй цор ганц хувилбараар дуулна гэж бодож байсан ч "New star music studio"-гийнхэн цаашид дуулах албан ёсны эрхийг нь надад өгсөн. Гэхдээ одоогоор дахиж дуулах эсэхээ сайн мэдэхгүй байна.

-“Авьяаслаг монголчууд” шоунд оролцож байхдаа цахилгааны инженер мэргэжилтэй болохоор суралцаж байгаа гэж байсан. Төгсөөд мэргэжлээрээ ажилласан уу?

-Оюутан байхдаа “Авьяаслаг монголчууд” шоунд оролцож, түрүүлсэн учраас төгсөөд мэргэжлээрээ ажиллаагүй. Ямар ч эргэлзээгүйгээр урлагийн замыг сонгож, өнөөдрийг хүртэл дуу, уран бүтээлдээ бүх зүйлээ зориулаад явж байна.

-Багын мөрөөдөл нь юу байв. Дуучин болох талаар ер нь мөрөөдөж, төсөөлж байсан болов уу?

-Яг дуучин болно гэж бол мөрөөдөж байгаагүй. Багадаа бусад хүүхдүүдийн л адил цагдаа, сансрын нисгэгч болохыг мөрөөддөг байсан. Бас хөлбөмбөгт их сонирхолтой хүүхэд байсан учраас мэргэжлийн хөлбөгчин болно ч гэж бодож байсан. Монголын анхны премер лигт тоглосон тамирчин болохыг хүсдэг байлаа. Одоо бол хөлбөмбөгийн үнэнч фанат, үзэгч л болсон байна даа.

-Хувийн амьдралдаа цаг зарцуулж чадаж байна уу. Гэр бүл төлөвлөлт дээр ямар бодолтой явдаг вэ?

-Том зорилгын төлөө тэмүүлж байгаа болохоор одоогоор хувийн амьдралаа хойш нь тавиад ажилдаа л анхаарч байна. Ажил маань ч тийм байхыг шаарддаг. Магадгүй цаг нь болохоор сайхан гэр бүлтэй болох байх.

-Найз охин?

-Байхгүй. Ганц бие.

-ӨӨРИЙНХӨӨ IDOL-ЫН ХЭМЖЭЭНД ОЧИХ ТОМ МӨРӨӨДӨЛ ӨВӨРТЛӨӨД, ТҮҮНИЙХЭЭ ТӨЛӨӨ ХӨДӨЛМӨРЛӨӨД, ХИЧЭЭЖ БАЙНА-

-Хамгийн анхны том тайз тань юу байсан бэ?

-“Авьяаслаг монголчууд” шоуны тайз миний хамгийн анхны том тайз бас миний амьдралыг өөрчилж, асар том зорилго мөрөөдөлтэй болгосон хамгийн чухал тайз байсан.

-Амьдралыг тань өөрчилсөн “Авьяаслаг монголчууд” шоунд оролцох шийдвэрийг өөрөө гаргасан уу?

-Үгүй. Манай үеэл ах намайг яг хөтөлж аваачиж бүртгүүлсэн.

-Тухайн үед шоундаа түрүүлж, энэ хүртэл явна гэж бодож, төсөөлж байв уу?

-Ёстой үгүй. Яаж алдаа гаргахгүй, гоё дуулах вэ л гэж бодож байснаас түрүүлэх талаар төсөөлж ч байгаагүй.

-Хэтийн зорилго тань юу вэ?

-Маш том зүйлд зорьж байгаа. Дэлхийн хэмжээний super star, өөрийнхөө IDOL-ын хэмжээнд очих том зорилго, мөрөөдөл өвөртлөөд, түүнийхээ төлөө хөдөлмөрлөөд, хичээж байна. Одоогоор бол тэр зорилгодоо хүрэхэд хол байна. Гэхдээ огт боломжгүй зүйл гэж байхгүй болохоор шантралгүйгээр зөвхөн урагшаа хараад зүтгэнэ гэж боддог.

-Таны IDOL хэн бэ?

-Миний айдол бол Франк Синатра. Тэр хүн шиг мундаг дуучин болохыг мөрөөддөг.