УИХ-ын 2024.04.26-ны өдрийн чуулганы нэгдсэн хуралдаан үргэлжилж байна. Хуралдаанаар МУ-ын Ерөнхийлөгчийн гаргасан саналаар Монгол Улсаас зарим улсад суугаа гадаадын элчин сайд нарыг эргүүлэн татах, томилох асуудлыг хэлэлцэж байна. Саналыг ЕТГ-ын дарга Я.Содбаатар танилцууллаа.
Монгол Улсын Үндсэн хуулийн 33.1.5 дахь заалт, Монгол Улсын Ерөнхийлөгчийн тухай хуулийн 14.3 дахь хэсэг, ЗГ-ын тухай хуулийн 15.4 дэх хэсэг, Дипломат албаны тухай хуулийн 16.1 дэх хэсгийг тус тус үндэслэн Монгол Улсаас БНХАУ-д суугаа Онц бөгөөд бүрэн эрхэт элчин сайд Т.Бадралыг эргүүлэн татаж, БНХАУ-д суух Онц бөгөөд Бүрэн эрхэт элчин сайдаар Н.Энхболдыг томилох саналыг хэлэлцлээ.
Тодруулбал, эргүүлэн татаж буй БНХАУ-д суугаа онц бөгөөд бүрэн эрхэт элчин сайд Т.Бадралын томилолтын хугацаа дуусгавар болсон тул орны хүнийг томилох асуудлыг хэлэлцэж буй. Тэгвэл УИХ-ын гишүүдийн гаргасан саналаар элчин сайдын томилгооны асуудлыг хаалттай хуралдаанаар хэлэлцсэн бөгөөд дэмжжээ.
