“Хөгжлийн банкны” гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдааны үеэр Хөгжлийн банкны өмгөөлөгч Х.Баатарбилэг "Хөгжлийн банк өнөөдрийн шүүх хуралдаанд дөрөвхөн өмгөөлөгчтэй оролцож байгаа. Харин шүүгдэгчдийн өмгөөлөгч 100 гаруй байна. Бид нарт олгож байгаа цаг хугацааны хувьд бүх өмгөөлөгчтэй мэтгэлцээд гэм бурууг хэлэлцэх цаг байхгүй. Хавтаст хэргийг тал талаас уншиж танилцсан, өөр өөрсдийнхөөрөө дүгнэлтээ илэрхийлж байна. Өмгөөлөгчид олдож байгаа цаг хугацаагаа хохирол, хор уршигтай холбож гол зүйлээ ярихыг чухалчилж байна. Энд яриад нэхэмжлээд байгаа мөнгө зөвхөн Хөгжлийн банкны мөнгө биш. Засгийн газрын, ард түмний, татвар төлөгчдийн мөнгө. Үүнийг шүүх хуралдааны явцад байнга илэрхийлж, хохирлоо барагдуулахыг л хүсэж байна.

Банк мөнгөө авч зээлсэн бондоо буцааж төлмөөр байна. Хэрвээ энэ шүүх хурлаас хор уршиг шийдэхгүй гээд үзвэл Хөгжлийн банк тэр хор уршгийг гадаад улсад өөрсдөө төлнө. Банк дахиад хохирох гээд байна. Ийм учраас Хөгжлийн банкнаас гаргаж өгсөн хохирлыг тооцооллын дагуу бүрэн багадуулж өгнө үү гэж хүсэж байна" гэсэн юм.