Ерөнхийлөгч У.Хүрэлсүхийн автортай "Тэрбум мод" тарих хөтөлбөрийг бүх нийтээрээ дэмжин ажиллаж байгаа. Энэ хүрээнд Завхан аймгийн Их-Уул сумын иргэд цөөнгүй мод тарьсан байна. Гэвч тарьсан модоо модон банзан хашаагаар хашаалсан нь нийгмийн сүлжээнд шүүмжлэл дагуулаад байгаа юм. Энэ талаар Завхан аймгийн Засаг дарга Д.Түвшинжаргалаас тодрууллаа.

-Их-Уул сумынхан тарьсан модоо банзан хашаагаар хашаалсан байсан нь цахим орчинд шүүмжлэл дагуулаад байна. Та энэ асуудлыг мэдсэн үү?

-Мэдсэн.

-Мод тарина гэчихээд мод тайрч, хашаа барих нь зөв гэж үү?

-Ургаа модыг унагасан юм биш. Хуулиар ч хориглосон зүйл. Шатсан ойгоос мод бэлтгэдэг. Өөрөөр хэлбэл, Байгаль орчин, аялал жуучлалын яамнаас баталсан зөвшөөрлийн дагуу байгаль орчны газраас заасан газраас манай аймгийн ААН-үүд мод бэлтгэдэг.

-Гэхдээ ойрын жилүүдэд Завхан аймгийн хэмжээнд томоохон хэмжээний ойн түймэр гараагүй биз дээ?

-2000 онд Тарвагтайн нуруу буюу Идэр сумаас эхлээд Их-Уул сумын урд хэсэг хүртэл бараг 130 гаруй га ой шатсан.

-Гэхдээ бүхэл бүтэн 22 жил энэ ойгоос шатсан мод зөөгөөд дуусаагүй гэж үү?

-Яаж дуусах вэ. Одоо ч зөөж л байна. Манай аймгийн хэмжээнд мод бэлтгэлийн 20 гаруй ААН бий. Эдгээр ААН-үүд Завхан болон бусад аймгуудын модны хэрэгцээг хангадаг.

-"Тэрбум" мод хөтөлбөрийн хүрээнд танай аймаг хэдий хэр талбайд мод тарих төлөвлөгөөтэй байгаа вэ?

-Улиастай, Идэр, Завхан, Тэсийн голын ай сав дагуу мод тарихаар төлөвлөсөн. Эхний ээлжинд Улиастай болон Идэр голын ай сав дагуу мод тариад эхэлсэн.

-Мод тарихаас илүүтэй арчилгаа, хамгаалалт хамгийн чухал. Энэ асуудлыг яаж шийдэх вэ. Модоороо л хашаалах уу?

-Тэгж л таарна. Модтой газарт нь модоор нь, модгүй бол төмрөөр хашаална.