Суданы амьтны хүрээлэнгийн хүнс тэжээлийн дутагдалд орсон арслангуудын зураг дэлхий нийтийн дургүйцлийг хүргэж, амьтныг хамгаалах цахим кампанит ажил явагдаж байна.

Тураалд орсон Африкийн таван арсланг Суданы нийслэл Хартум хотын Аль-Кураши паркаас сайн дурын тэмцэгч Осман Сали олжээ.

Осман Сали арслангийн зургийг фэйсбүүк хуудастаа #SudanAnimalRescue гэсэн хаштагийн хамт байрлуулжээ.

“Амьтны хүрээлэнгийн удирдлагуудтай холбогдоход байгаль хамгаалагч нар амьтдын асаргаа, хоол ундны асуудлыг хариуцдаг, гэхдээ одоогоор түр хоол тасраад байгаа. Амьтны хүрээлэнгийн сарын төсөв нэг арсланг долоо ч хоног тэжээж хүрдэггүй” гэж мэдэгдсэн гэж өөрийн цахим хуудсандаа бичжээ.

Эдийн засаг хямралтай байгаа учир арсланг хэдэн долоо хоног хооллоогүй, эмчлээгүй гэсэн байна.

Зарим арслан биеийн жингийн гуравны нэгээ алдсан, хоёр нь өвчтэй байжээ. Нэг эм арслан Даваа гарагт амиа алдсан гэдгийг APF агентлагт паркийн удирдлагууд хэлжээ.

"Дөрвөн савар" олон улсын амьтныг хамгаалдаг байгууллага Суданы амьтны хүрээлэнгүүдэд шинжилгээ хийж, амьтдыг аврах үйл ажиллагаа явуулахаар болсон байна. 

Одоогоор хэчнээн Африкийн арслан Суданд байгаа нь тодорхойгүй байна. Олон улсын байгаль хамгааллын байгууллагаас Африкийн арсланг “эрсдэлд байгаа” гэж тодорхойлсон байдаг.

1993-2014 оны хооронд арслангийн тоо толгой 43%-иар буурч, ердөө 20 мянга л үлдсэн баримт бий.

Эх сурвалж: Independent