Колумбийн нийслэл Боготад энэ сарын 05-нд эхэлсэн Хүндийн өргөлтийн насанд хүрэгчдийн ДАШТ-ий 10 дахь өдөр өнөөдөр болж байна. Тэгвэл өнөөдөр Монгол Улсын гавьяат тамирчин Мөнхжанцангийн Анхцэцэг 87 кг-ын жинд түлхэлттэй өргөлтөөр мөнгөн медаль хүртлээ.

Богота хотын "Gran Carpa Americas Corferias"-т болсон тэмцээнд М.Анхцэцэг маань түлхэлттэй хоёр дахь өргөлтөөрөө 143 кг-ыг түлхэж медалийн болзол хангасан. Манай тамирчин огцомоор захиалсан гурван өргөлтөө өргөж чадаагүй бөгөөд нийлбэр дүнгээр медаль хүртэх боломжгүй болсон юм.

Тэрбээр ДАШТ-д 2021 онд Ташкентэд энэ жинд огцом, түлхэлттэй өргөлтөөр тус бүр мөнгө, нийлбэрээр алт, 2017 онд Анахаймд 75 кг-д, 2019 онд Паттаяд 81 кг-д огцом өргөлтөөр тус бүр хүрэл медаль хүртэж байв.