Монголын үндэсний морин уралдаан, уяачдын холбооноос "Монгол наадам-Монгол адуу" тайван жагсаал, цуглааныг зохион байгуулж байна. Жагсагчдын хувьд Үндэсний их баяр наадмын морин уралдаанд уралдах морьдыг сэрвээний өндрөөр хэмжих нь буруу юм. Хэрэв сэрвээний өндрөөр хэмжиж уралдвал зөвхөн эрлийз морины уралдаан болно гэдэг байр суурийг илэрхийлж байна.

Монголын Үндэсний морин уяачдын холбооны Ерөнхийлөгч, Тод манлай уяач Ц.Дуламсүрэн "Монгол адуу буюу Монгол наадамд жишиг тогтоосон хүн бол Б.Наранхүү. Монгол адууны хамгийн дээд үнийг энэ хүн тогтоосон. "Мон-Уран"-ы Б.Наранхүү Монгол цусны хурдан удмын адууг 800 саяар худалдаж авсан. Тэр мөнгө нь Монгол айлд хөрөнгө оруулалт болж очсон" гэдгийг хэллээ.