Шар түвшинд шилжсэнтэй холбогдуулан Коронавируст халдварын эсрэг хариу арга хэмжээг цаашид ЭМЯ, ХӨСҮТ гардан хариуцахаар болсон талаар Шадар сайдын хэвлэл мэдээллийн албанаас мэдээллээ. Тодруулбал, Улсын онцгой комиссын өнөөдрийн /2022.03.17/ хуралдаанаар коронавируст халдвараас урьдчилан сэргийлэх, тэмцэх хариу арга хэмжээ авахтай холбоотой бүхий л үйл ажиллагааг цаашид ЭМЯ, ХӨСҮТ-д хариуцуулж, нэгдсэн удирдлага, зохион байгуулалтаар хангаж ажиллах шийдвэр гаргасан байна.

Ингэхдээ үүссэн нөхцөл байдлын үед авч хэрэгжүүлж буй арга хэмжээний талаарх шаардлагатай мэдээллээр Улсын онцгой комиссыг тогтмол хангаж ажиллахыг Эрүүл мэндийн сайд С.Энхболд, ХӨСҮТ-ийн захирал Ц.Билэгтсайхан нарт үүрэг болгосон юм.