УИХ-ын Эдийн засгийн байнгын хорооны өнөөдрийн хуралдаанаар, Хот, суурины ус хангамж, ариутгах татуургын ашиглалтын тухай хуульд нэмэлт оруулах тухай хуулийн төслийг хэлэлцэхийг дэмжив. 

Хуулийн төслийг УИХ-ын гишүүн Ж.Бат-Эрдэнэ нарын гишүүд санаачилж, өнгөрсөн сарын 11-нд УИХ-д өргөн барьжээ. Төсөл санаачлагч УИХ-ын гишүүн Ж.Бат-Эрдэнэ төслийг танилцуулахдаа, уг хуулийн төслөөр шинээр үүсгэн байгуулсан Хот, суурины ус хангамж, ариутгах татуургыг ашиглалт, үйлчилгээг зохицуулах зөвлөлд ус хангамж, ариутгах татуургын улсын байцаагчийн эрх олгохоор зохицуулсныг дурдлаа. Ингэснээр, хуулийн хэрэгжилтийг хангуулах, хариуцлагын механизмыг бүрдүүлэхийн сацуу хүн амын эрүүл, аюулгүй амьдрах, орчны бохирдлоос хамгалаагдах эрхийг хангах, төрийн үйлчилгээг тэгш, хүртээмжтэй, хариуцлагатай хүргэх боломж бүрдэнэ гэдгийг онцлов. Сүүлийн үед ус хангамжийн болон усны эх үүсвэр, шугам сүлжээний хамгаалалтын болон эрүүл ахуйн бүсэд зөвшөөрөлгүй барилга байгууламж барих, аж ахуйн ажил эрхлэх, байгаль орчин, усны эх үүсвэрийг бохирдуулах зэрэг зөрчил газар авсан. Иймээс ус хангамжийн болон усны эх үүсвэр, шугам сүлжээний хамгаалалтын бүсэд гарч буй зөрчлөөс урьдчилан сэргийлэх, тэдгээрийг таслан зогсоох, хүлээлгэх хариуцлагыг чангатгах, байгаль орчинд учруулсан хохирлыг нөхөн төлүүлэх зохицуулалтыг тодорхой болгох шаардлагатай байна гэж төсөл санаачлагчид үзжээ. 

Хэлэлцэж байгаа асуудалтай холбогдуулан асуулт асуух гишүүн байгаагүй бөгөөд УИХ-ын гишүүн Х.Баделхан, Д.Тэрбишдагва нар хуулийн төслийг дэмжиж байгаагаа илэрхийлж үг хэлэв. 

Ингээд Хот, суурины ус хангамж, ариутгах татуургын ашиглалтын тухай хуульд нэмэлт оруулах тухай хуулийн төслийн дэмжиж, чуулганы нэгдсэн хуралдаанаар хэлэлцүүлэхийг хуралдаанд оролцсон гишүүдийн олонх дэмжсэн. Энэ талаарх Байнгын хорооны санал, дүгнэлтийг УИХ-ын гишүүн Б.Ундармаа чуулганы нэгдсэн хуралдаанд танилцуулахаар болов.

Ус хангамж, ариутгах татуургын ашиглалт үйлчилгээ гэдэг нь ус олборлолтоос эхлээд цэвэрлэх байгууламжаас гарсан ус, лагийг байгаль орчин, хүн амын эрүүл мэндэд сөрөг нөлөө үзүүлэхгүйгээр ашиглах, устгах, хадгалах, зайлуулах бүх шатанд хамаарах цогц ажиллагаа юм. Улсын хэмжээнд, 130 гаруй бохир ус цэвэрлэх байгууламж байгаагаас 51 нь хэвийн, 27 нь хагас ажиллагаатай. Огт ажиллагаагүй 47 бохир ус цэвэрлэх байгууламж байна. Үүнээс үүдэн жилд, 120 сая гаруй м3 бохир ус байгальд шууд хаягддаг байна.