Эрүүгийн хуулийн 18.3.1, 18.6.2 буюу “их хэмжээний мөнгө угаах, татвараас оргон зайлсан” гэх хэрэгт буруутгагдан шалгагдаж буй Монгол Улсын Ерөнхийлөгч асан Ц.Элбэгдорж, ЕТГ-ын дарга асан П.Цагаан нарыг баривчлах шүүхийн тогтоолыг Дүүргийн эрүү, иргэний хэргийн хялбар ажиллагааны анхан шатны тойргийн шүүхээс хүчингүй болгож шийдвэрлэсэн билээ.

Хэрэв шүүхээс баривчлах тогтоолыг хэвээр үлдээж шийдвэрлэсэн бол Сингапурт саатуулагдаад байсан П.Цагааныг мөн Олон Улсын Интерполоор эрэн сурвалжлах буланд мэдээлэл нь байршсан Ц.Элбэгдорж нарыг Монгол Улсад авчирч хуулийн дагуу шалгаж, шийтгэл ноогдуулах байсан аж. Хачирхалтай нь шүүх Ц.Элбэгдорж, П.Цагаан нарын талд шийдвэр гаргасан нь олон нийтийн дургуйцлийг хүргэж буй.

Өөрөөр хэлбэл Ц.Элбэгдорж, П.Цагаан нарыг баривчлах тогтоолыг хүчингүй болгох асуудал ердөө 24 цагийн дотор шүүх дээр ирж, Дүүргийн эрүү, иргэний хэргийн хялбар ажиллагааны анхан шатны тойргийн шүүхийн шүүгч С.Олзод "баривчлах" тогтоолыг хүчингүй болгож шийдвэрлэсэн юм.

Тэгвэл дээрх шүүхийн процесстой холбоотойгоор ХЗДХ-ийн сайд О.Алтангэрэл "Засгийн газар, АТГ-ын шударга ёсны тэмцлийн замд тээглэж буй бул хар чулуу нь шүүх, авилгачдын халхавч нь бусдын утсан хүүхэлдэй бологч шүүгч гэдэг нь тодорхой болж байна. Шүүгч бусдын нөлөөлөлд орвол ял шийтгэгдэх эрүүгийн хуулийн өөрчлөлтийг нэн даруй өргөн барина" гэж мэдээлсэн нь анхаарал татаж буй.