Архангай аймаг, Тариат сумын Хорго багийн “Тахилт” гэдэг газар /аймгийн төвөөс хойд зүгт 185 км-т, сумын төвөөс зүүн урд зүгт 30 км-т/ тус сумын харьяат иргэн Г нь есдүгээр сарын 29-ний өдрийн 02:00 цагийн орчим гэрээсээ гараад сураггүй болсон бөгөөд “Дагиналтай” нуурын усанд осолдсон байж болзошгүй тухай дуудлагыг ОБГ есдүгээр сарын 29-ний өдрийн 05:30 цагт хүлээн авсан.

Тус аймгийн Онцгой байдлын газрын Эрэн хайх, аврах салбар, Тариат сум дахь Эрэн хайх, аврах бүлэг, Цагдаагийн тасгийн алба хаагчид, ар гэрийнхэн тус сумын харьяат иргэн Г /38 настай, эрэгтэй/-ыг эрэн хайх ажиллагааг аравдугаар сарын 01-ний өдрийн 08:20 цагаас 19:00 цаг хүртэл “Дагиналтай” нууранд 8 удаагийн шумбалт хийж, “Дагиналтай хад” гэдэг газар 5 км-ийн тойрогт автомашинтай болон явганаар зохион байгуулсан боловч үр дүнд хүрээгүй тул түр зогсоосон. Харин өнөөдөр буюу аравдугаар сарын 02-ны өдрийн 08:00 цагт эрэн хайх ажиллагааг эхлүүлсэн байна.