Аялал жуулчлалыг хөгжүүлэх Үндэсний хорооны 2023 оны хоёрдугаар хуралдаанаар жуулчдад зориулсан ариун цэврийн байгууламж бүхий түр буудаллах цэг, үйлчилгээний цогцолбор, отоглох цэг байгуулах ажлын явц, тулгамдаж буй асуудал, өвлийн аялал жуулчлалын стратеги төлөвлөлт, гадаад зах зээлд чиглэсэн маркетинг, жуулчдын эрх ашгийг хангах утасны үйлчилгээ зэрэг асуудлыг хэлэлцсэн юм.
Энэ үеэр Аялал жуулчлалын мэргэжлийн холбооны ерөнхийлөгч Ц.Баатарсайхан "Аялал жуулчлалын компанийнхантай уулзахад "Борлуулалт 70-80 хувь, ашиг 2-3 дахин нэмэгдсэн" гэж байна. Бид одоогийн байдлаар БНСУ-аас 77 мянган жуулчин хүлээн аваад байгаа. Үлдсэн хугацаанд сайн ажиллавал 2019 оны үзүүлэлтээ 2-3 дахин өсгөх боломж байна. Энэ бол чамлахаар үзүүлэлт биш. КОВИД-ын дараа аялал жуулчлалаа сэргээж чадсан цөөн орны тоонд Монгол Улс орж байгаа" хэмээн мэдээлэв.
