Хүнс, хөдөө аж ахуй, хөнгөн үйлдвэрийн сайд Х.Болорчулуун, дэд сайд Ж.Бат-Эрдэнэ нар харьяа байгууллагуудын үйл ажиллагаатай газар дээр нь танилцаж, ажилтан албан хаагчидтай уулзаж, цаашдын хамтын ажиллагаа, бодлого, зорилтын хүрээнд санал солилцлоо.

ХӨДӨӨ АЖ АХУЙГ ДЭМЖИХ САНГ АЖ АХУЙН ТООЦООТОЙ БОЛГОНО

Хөдөө аж ахуйг дэмжих сан нь газар тариалангийн салбарын бодлогыг гардан хэрэгжүүлж, Монгол Улсын хүнсний стратегийн гол бүтээгдэхүүнийг үйлдвэрлэхэд түшиц болдог. Тус байгууллагыг хөгжлийн шинэ түвшинд гаргаж, зах зээлийн зарчимд нийцүүлэн орлогоороо зарлагаа санхүүжүүлдэг, ашигт үйл ажиллагаатай, аж ахуйн тооцоот байгууллага болгоход чиглэсэн эрх зүйн орчныг бүрдүүлэхээ сайд Х.Болорчулуун илэрхийллээ.