Завхан аймгийн Нөмрөг сумын Нуур багийн “Нүхэн хад” гэх газар Увс аймгийн Улаангом сумаас Улаанбаатар хотын чиглэлд зорчиж явсан суудлын автомашин автозамын зорчих хэсэгт зогсож байсан ачааны автомашины хойд талаас мөргөж, суудлын автомашины бүхээгт 2 хүн хавчуулагдаж нас барсан харамсалтай хэрэг гарчээ.

Тус аймгийн Онцгой байдлын газрын Сонгино сум дахь Эрэн хайх, аврах бүлгийн алба хаагчдыг очиход “Приус-20” загварын суудлын автомашин, “Титан” загварын ачааны автомашины хойд талаас мөргөж, суудлын автомашины бүхээг дотор 29 настай эрэгтэй Т, 17 настай эрэгтэй Б нар хавчуулагдаж нас барсан байсан аж. Тиймээс онцгойгийн албан хаагчид цогцсыг гаргаж, Тосонцэнгэл сум дахь сум дундын Цагдаагийн хэлтсийн мөрдөгчид шилжүүлэн өгсөн байна.