АНУ-ын Ерөнхийлөгч Жо Байден “COVID-19” хэрхэн үүссэнийг шалгахыг тагнуулын байгууллагууддаа үүрэг болгожээ. “Ж.Байден АНУ-ын тагнуулын байгууллагуудад вирусний гарал үүслийг тогтоох чиглэлд гаргаж буй хүчин чармайлтаа хоёр дахин нэмэгдүүлж, 90 хоногийн дотор өөрт тайлагнахыг үүрэг болголоо” гэж Цагаан ордны мэдэгдэлд дурдсан байна.
“COVID-19” халдварын анхны тохиолдол БНХАУ-ын Ухань хотод 2019 оны сүүлээр бүртгэгдсэн юм. Түүнээс хойш дэлхий даяар 168 сая гаруй хүн халдвар авч, 3.5 сая хүн нас баржээ. Эрүүл мэндийн байгууллагууд “COVID-19”-ийн эхний тохиолдлуудыг Ухань хотын далайн бүтээгдэхүүний захтай холбож байгаагаас гадна судлаачид вирусийг анх амьтнаас хүнд дамжсан хэмээн үзэж байна.
Гэвч саяхнаас АНУ-ын олон нийтийн хэвлэл мэдээллийн хэрэгслүүдэд вирус Хятадын лабораториос тархсан байх магадлалтай гэх мэдээлэл гарах болжээ. Харин Бээжингийн зүгээс ийм мэдээллийг зэмлэн буруушаагаад, эсрэгээрээ АНУ-ын лабораториос үүдэлтэй байж болзошгүй гэж мэдэгдсэн байна.
Эх сурвалж: BBC
