Хонконгийн шүүх сөрөг хүчний залуу идэвхтэн Жошуа Вонгт 10 сарын шоронд хоригдох ял оноожээ. Түүнийг өнгөрсөн оны зургадугаар сарын 4-нд зөвшөөрөлгүйгээр хийсэн жагсаал цуглаанд оролцсон хэмээн буруутгасан.
Жошуа Вонгоос гадна түүний гурван хамтрагч 4-6 сарын хоригдох ял авчээ. Тэд 26, 27 насны эмэгтэйчүүд байсан юм. Вонг энэ хэргээс гадна эсэргүүцэлтэй холбоотой өөр хэргээр ял эдэлж байгаа юм. Тодруулбал, 2019 оны зургаадугаар сарын 21-нд цагдаагийн төв байрыг бүсэлсэн хэрэгт холбогдуулан түүнд өнгөрсөн оны арванхоёрдугаар сард 13.5 сарын шоронд хоригдох ял оноожээ. Харин өнгөрсөн дөрөвдүгээр сард 24 настай Вонгт эсэргүүцэлд оролцсонтой нь холбогдуулан нэмж дөрвөн сарын хорих ял оноосон байна. Хүчирхийлэл, эвдэн сүйтгэх ажиллагаа дагуулсан эмх замбараагүй байдал хэдэн сар үргэлжилж, цагдаа нар 10 мянга гаруй сэжигтнийг баривчилж, 2.5 мянга гаруй хүнд хэрэг үүсгэсэн байна.
