НЭГ ДОРООС: Хүүхдийн зуслангууд үнээ өнгөрсөн жилийнхээс 75-365 мянган төгрөгөөр НЭМЖЭЭ

2026 онд нийслэлийн хэмжээнд бүртгэлтэй 17 зуслан үйл ажиллагаа явуулахаар төлөвлөн бэлтгэлээ хангаж байгаа талаар Нийслэлийн Гэр бүл, хүүхэд, залуучуудын хөгжлийн газраас мэдээлсэн. Эдгээр нь өдөрт 4000 орчим хүүхэд хүлээн авах хүчин чадалтай бөгөөд долоо хоногийн төлбөр нь дунджаар 500-795 мянган төгрөг байна.

Бид хүүхдээ зусланд хамруулахаар хайж, судалж байгаа эцэг, эхчүүдэд зориулан хүүхдийн зуслангуудын үнийн мэдээллийг нэгтгэн хүргэж байна.

2026 оны зуны сурагчдын амралт эхлэхтэй холбогдуулан хүүхдийн зуслангууд ээлжийн хуваарь, үнэ тариф болон хөтөлбөрийн мэдээллээ ил тод зарлаж, бүртгэлээ авч эхэлсэн байна.

Энэ жилийн хувьд зуслангуудын дундаж үнэ ханш сонгосон хоног, хөтөлбөр болон орчноосоо хамаарч 500.000-795.000 төгрөгийн хооронд хэлбэлзэж байгаа бөгөөд ихэнх зуслангууд 5–10 хоногийн хугацаатайгаар ээлжүүдээ зохион байгуулж байна.

"НАЙРАМДАЛ" зуслангийн эхний 4 ээлж буюу ирэх долоодугаар сарын 10 хүртэлх бүх захиалга нь дүүрчээ

Олон улсын хүүхдийн "Найрамдал" цогцолбор энэ оны хуваариа танилцуулсан бөгөөд нийт 9 ээлжээр хүүхдүүдийг амраахаар төлөвлөжээ.

Тодруулбал, хамгийн томд тооцогдох "Найрамдал" зуслангийнхан эхний ээлжийн хүүхдүүдээ зургаадугаар сарын 8-нд хүлээн авсан байна. Тус ээлжид 6-10 насныхан хамрагдсан бөгөөд төлбөр нь 614 мянга 500 төгрөг. Харин дараагийн ээлжид 8-12 насныхан зургадугаар сарын 15-22-нд амрахад 614 мянга 600 төгрөгийн төлбөртэй байна. Өнөөдрийн байдлаар эхний 4 ээлж буюу ирэх долоодугаар сарын 10 хүртэлх бүх захиалга нь дүүрсэн байна. Харин 5-9 дүгээр ээлжийн бүртгэл, энэ сарын 19-26-ны хооронд явагдах юм байна.

Найрамдлынхан үнээ өнгөрсөн жилийнхээс 237.000-245.000 төгрөгөөр нэмсэн байна.