Үхрийн цул махны үнэ өмнөх долоо хоногоос 0.4 хувиар өсөж килограмм нь дунджаар 22653 төгрөгийн үнэтэй байна. Энэ сарын 25-ны өдрийн байдлаар Нийслэлийн статистикийн газрын үнэ ханшийн судалгаагаар ийм дүнтэй байгаа юм. Өмнөх долоо хоног цул махны үнэ 0.1 хувиар буурч килограмм нь дунджаар 22570 төгрөг байв. Өөрөөр хэлбэл, 83 төгрөгөөр нэмэгджээ. Гэхдээ зарим зах, худалдааны төвүүдэд үхрийн цул мах килограмм нь дунджаар 23 мянган төгрөгийн үнэтэй байгаа юм.

Нийслэлийн статистикийн газраас долоо хоног бүр өргөн хэрэглээний бараа бүтээгдэхүүний үнэ ханшийн мэдээллийг танилцуулдаг. Статистик мэдээллийг харвал, хонины ястай мах килограмм нь дунджаар 16802 төгрөг, үхрийн ястай мах килограмм нь дунджаар 19820 төгрөгийн үнэтэй байгаа бол гурил, төмс, сонгины үнэ тогтвортой байна. Мөн ҮСХ-ны мэдээллээр, нийслэлд гол нэрийн барааны үнэ өмнөх сараас 3.2 хувь, өмнөх 7 хоногоос 0.6 хувиар тус тус өссөн байна.