УИХ-ын ээлжит бус чуулганы үдээс хойших хуралдаанаар ШЕЗ-ийн шүүгч бус гишүүнийг чөлөөлөх тухай асуудлыг хэлэлцэж байна.
Тодруулбал, ШЕЗ-ийн шүүгч бус гишүүн Н.Отгончимэг нь үүрэгт ажлаасаа чөлөөлөгдөх хүсэлтийг өгчээ. Уг албан бичгийг Хууль зүйн байнгын хороо наймдугаар сарын 28-нд хэлэлцсэн бөгөөд гишүүдийн олонх нь Н.Отгончимэгийн үүрэгт ажлаасаа чөлөөлөгдөх хүсэлтийг дэмжээгүй байна.
ШЕЗ-ийн шүүгч бус гишүүн Н.Отгончимэг 2021 оны 11 дүгээр сард нээлттэй сонгон шалгаруулалтаар томилогдсон юм.
Н.Отгончимэг нь хугацаанаасаа өмнө чөлөөлөгдөх хүсэлт гаргасан гол шалтгаанаа УИХ-ын дарга Д.Амарбаясгалангийн зөвлөхөөр ажиллах саналыг хүлээн авсантай холбоотой гэж тайлбарлажээ.
Чуулганы хуралдаанаар Н.Отгончимэгийг ШЕЗ-ийн шүүгч бус гишүүнээс наймдугаар сарын 30-аас эхлэн чөлөөлөх саналыг гишүүдийн олонх дэмжив. Түүнийг чөлөөлөх тухай УИХ-ын тогтоолыг баталсанд тооцов.
