Нүүрсний хулгайн асуудлаарх нээлттэй сонсгол үргэлжилж байна. Энэ үеэр нүүрсний хэрэгт холбогдуулан шалгаж байсан Ерөнхийлөгч асан Х.Баттулгыг хил гарсан асуудлаар тодруулсан УИХ-ын гишүүн Т.Доржхандын асуултад АТГ-ын дарга, тэргүүн комиссар З.Дашдаваа "Нүүрсний гэх тодотголтой эрүүгийн 32 хэрэг АТГ болон ЦЕГ-т шалгагдаж байна. Оффтейк гэрээтэй холбоотой гэрээнүүд АТГ-д ирсэн. Оффтейк гэрээнүүдэд мэргэжлийн нарийн шинжээч томилно. Шинжээч томилогдсоноор энэ гэрээ нь гэмт хэргийн шинжтэй эсэх, бусдад давуу байдал олгосон эсэх зэргээр Монгол Улсад байгаа нарийн шинжээч нарын баг гарч ажиллаад дүгнэлт гарна. Манай байгууллага Х.Баттулгыг гурван асуудалд шалгаж байгаа. "Эрдэнэс Тавантолгой"-той холбоотой асуудалд тайлбар авсан. Х.Баттулгыг оргосон гэдгийг хэн нотлоод байгаа юм, үүнийг асууя. Түүнийг яллагдагчаар татчихсан тохиолдолд шүүхэд дуудагдахад байгаагүй тохиолдолд оргосон гэж үзнэ. Эрүүгийн хэрэг хянан шийдвэрлэх ажиллагаанд оролцогч нар эрх үүргийнхээ дагуу оролцохоос хэн нэгэн албан тушаалтан, хэн нэгэн иргэн оролцохгүй, хуулиараа хориотой. Т.Доржханд гишүүн ээ, та шүгэл үлээж болно. Энэ эрүүгийн хянан шийдвэрлэх ажиллагаа гэдэг нь харилцан хуулиараа үүрэг хүлээдэг. Энд нээлттэй сонсгол дээр ч ярьж болохгүй" гэв.
