УИХ-ын чуулганы үдээс хойших нэгдсэн хуралдаанаар Н.Алтанхуяг гишүүний санаачилсан “Эрдэнэт үйлдвэр” Төрийн өмчит үйлдвэрийн газрын технологид тохирохгүй хүдрийн овоолгыг ашиглах тухай” УИХ-ын тогтоолын төслийг хэлэлцэх эсэх асуудлыг хэлэлцсэн. Эл тогтоолын төсөлд Орхон аймгийн иргэдэд хамтарсан сангаар дамжуулан хувьцаа эзэмшүүлэхээр тусгасан нь байгалийн баялгийн үр өгөөжийг хуваарилахтай холбоотой Үндсэн хуулийн холбогдох заалт болон Төсвийн тухай хууль болон бусад хуульд нийцэхгүй байна гэж үзэж Үйлдвэржилтийн бодлогын байнгын хорооны нийт гишүүдийн саналаар хэлэлцэхийг дэмжээгүй. Харин чуулганы хуралдаанаар эл тогтоолын төслийг хэлэлцэхийг дэмжиж, анхны хэлэлцүүлэгт бэлтгүүлэхээр Үйлдвэржилтийн байнгын хороонд шилжүүллээ.