АН хоёр хуваагдаад буй. Тодруулбал, Ерөнхийлөгч асан Х.Баттулга даргатай нэг АН, С.Эрдэнэ тэргүүтэй нэг АН-ынхан бий. Нам нь хоёр хуваагдсантай холбогдуулан УИХ дахь АН-ын бүлгийнхэн ч хоёр хуваагдаад байгаа юм. Сүүлийн үед бүлгийн хуралдаанаас гаргасан шийдвэрийн талаар УИХ-ын гишүүн С.Одонтуяа, Д.Ганбат нар мэдээлэл өгч байгаа нь тус хуралдаанд тус хоёр гишүүнээс өөр хүмүүс суухгүй байгаа гэх мэдээлэл цацагдаад байгаа.

Харин уг асуудалд АН-ын бүлгийн дарга Д.Ганбат мэдээлэл өглөө. Тэрбээр "АН-ын бүлэг анх 11 гишүүнтэй байсан. УИХ-ын хуулиар нам болон эвслүүд 8-аас дээш гишүүнтэй бол бүлэг байгуулж болно гэсэн. АН-ынхан гадна, дотнын нөлөөллөөр сүүлийн хоёр жилийн турш маргаантай байгаа. АН Үндсэн дүрмээ өнгөрсөн гуравдугаар сарын 30-нд бүртгүүлсэн.

АН-ын бүлэг албан ёсоор 8 гишүүнтэй гэж УИХ-д бүртгүүлсэн байгаа. Өнөөдрийн хуралдаанд бүлгийн хуралдаанд 4 гишүүн суусан. Ирц 50 хувь. 2-3 нь орон нутагт ажиллаж байгаа. Зарим нь хуралдаандаа суухгүй байгаа. Монгол Улсын хуулиар хэнийг ч албадан ажиллуулж болохгүй. Гэхдээ жирийн иргэн ажлынхаа 8 цагт ажилдаа ирэхгүй бол цалингаа хасуулаад явдаг. Тиймээс хуралдаандаа суухгүй байгаа гишүүддээ шат дараатай арга хэмжээ авна" хэмээлээ.